Bye-Law

Government of Kerala

Abstract

Associations – “Kerala Non-Gazetted Officers’ Union”-
Recognition- granted.

Public (Service D) Department

G.O.No. (Ms) 140/PD Dated, Trivandrum 2-5-67

Read: Representation dated 13.3.1967 from the General Secretary, Kerala Non-Gazetted Officers’ Union, Trivandrum -1

ORDER

Recognition is granted to “Kerala Non – Gazetted Officers Union” under the Kerala Government Servants Conduct Rules, 1960.

2.      The Union shall forward to Government copies of the amendments, if any, made to its by-laws from time to time and annual statement of accounts, for information.

3.      Change of address, consequent on the shifting of the Headquarters, if any, of the Union shall also be intimated to Government.

(By order of the Governer)

V.R.Narayanan Nair.

Assistant Secreatary.

To

The General Secretary, Kerala N.G.O’s Union , Trivandrum (with CL.)

Copy to all office Sections (including office sections of Law, Legislature and Finance Departments) of the Secreatariat for inclusion of the name of the Union in the Register maintained by them.

Copy to stock file.

കേരള നോൺ ഗസറ്റഡ് ഓഫീസേസ്ഴ്സ് യൂണിയൻ

തിരുവനന്തപുരം

നിയമാവലി

1. പേര്‌: ഈ യൂണിയന്റെ പേര്‌ “കേരള നോണ്‍ ഗസറ്റഡ്‌ ഓഫീസേഴ്‌സ്‌ യൂണിയന്‍” എന്നായിരിക്കും.
2. ആസ്ഥാനം: യൂണിയന്റെ ആസ്ഥാനം സംസ്ഥാനത്തിന്റെ തലസ്ഥാനത്തായിരിക്കും.
3. ഉദ്ദേശ്യലക്ഷ്യങ്ങള്‍
(എ) സംസ്ഥാന ജീവനക്കാര്‍ക്ക്‌ കൂടുതല്‍ മെച്ചപ്പെട്ട വേതനവും സേവനവ്യവസ്ഥകളും നേടിയെടുക്കുന്നതിനും അവരുടെ ധാര്‍മ്മികവും സാംസ്‌കാരികവും സാമ്പത്തികവും സാമൂഹികവും മറ്റു ഭൗതികവുമായ സാഹചര്യങ്ങളുടെ ഉന്നതിക്കുവേണ്ടിയും;
(ബി) സംസ്ഥാന ജീവനക്കാരില്‍ വര്‍ഗ്ഗബോധം വളര്‍ത്തുന്നതിനും;
(സി) പ്രത്യക്ഷമോ, പരോക്ഷമോ, ഈ രണ്ടുവിധത്തിലുമുള്ളതോ ആയ പ്രതികാര നടപടികള്‍ക്കു വിധേയരാകുന്ന യൂണിയനംഗങ്ങള്‍ക്ക്‌ ആവശ്യമായ എല്ലാ വിധ സഹായങ്ങള്‍ നല്‍കുന്നതിനും;
(ഡി) സംസ്ഥാന ഭരണയന്ത്രം കാര്യക്ഷമവും, അഴിമതി, സ്വജനപക്ഷപാതം എന്നിവയില്‍ നിന്ന്‌ വിമുക്തവുമായി നിലനിര്‍ത്തുന്നതിനും;
(ഇ) തൊഴിലാളി വര്‍ഗ്ഗത്തിനിടയില്‍ ഐക്യദാര്‍ഢ്യം ഉണ്ടാക്കുന്നതിനും, പൊതുവായ ആവശ്യങ്ങള്‍ നേടിയെടുക്കുന്നതിനും, ട്രേഡ്‌ യൂണിയന്‍ അവകാശങ്ങള്‍ അടിച്ചമര്‍ത്തുന്ന നടപടികളെ എതിര്‍ത്തു തോല്‍പ്പിക്കുവാനും മറ്റു തൊഴിലാളി വര്‍ഗ്ഗ സംഘടനകളുമായി യോജിച്ച പ്രവര്‍ത്തനം കെട്ടിപ്പടുക്കുന്നതിനും;
(എഫ്‌) ഈ യൂണിയന്റെ തനതായ പ്രവര്‍ത്തനവും വ്യക്തിത്വവും (Identity) ധനപരമായ നിയന്ത്രണവും യൂണിയന്റെ സ്വന്തം നിയമാവലികളാല്‍ നിയന്ത്രിക്കപ്പെടുമെന്ന വ്യവസ്ഥയോടെ, ഈ യൂണിയനില്‍ അംഗത്വത്തിനര്‍ഹതയില്ലാത്തവരെ പ്രതിനിധീകരിക്കുന്നതും എന്നാല്‍ ഉദ്ദേശ്യലക്ഷ്യങ്ങളില്‍ യോജിപ്പുള്ള അംഗസംഘടനകള്‍ ഉള്‍ക്കൊള്ളുന്ന ഫെഡറേഷനുകളില്‍ അഫിലിയേറ്റ്‌ ചെയ്യുന്നതിനും;
(ജി) മേല്‍പ്പറഞ്ഞ ഉദ്ദേശ്യലക്ഷ്യങ്ങള്‍ മുഴുവനുമോ അവയില്‍ ഏതെങ്കിലുമോ നേടിയെടുക്കുവാനുള്ള മറ്റു പ്രവര്‍ത്തനങ്ങള്‍ സംഘടിപ്പിക്കുന്നതിനും ഈ യൂണിയന്‍ ആത്മാര്‍ത്ഥമായി ശ്രമിക്കുന്നതായിരിക്കും.
4. ഘടന
(എ) ഈ യൂണിയന്റെ പ്രവര്‍ത്തനമേഖല കേരള സംസ്ഥാന മൊട്ടുക്കും വ്യാപകമായിരിക്കുന്നതാണ്‌.
(ബി) ഓരോ റവന്യൂ ജില്ലയിലും ഒന്നോ, സംസ്ഥാന കമ്മിറ്റി തീരുമാനപ്രകാരം ഒന്നില്‍ കൂടുതലോ, ജില്ലാ കേന്ദ്രം ഉണ്ടായിരിക്കും.
(സി) ജില്ലാ കേന്ദ്രത്തിനു കീഴില്‍ ഓരോ താലൂക്കിലും ഓരോ ഏരിയ ഉണ്ടായിരിക്കും. സാധാരണഗതിയില്‍ ഏരിയയുടെ പ്രവര്‍ത്തനപരിധി താലൂക്ക്‌ മുഴുവനുമായിരിക്കും; എന്നാല്‍ ആവശ്യമെന്നു കണ്ടാല്‍ ജില്ലയിലെ ഓരോ ഏരിയയുടേയും പ്രവര്‍ത്തനപരിധി ജില്ലാ കമ്മിറ്റിക്ക്‌ പുനര്‍നിര്‍ണ്ണയം ചെയ്യാവുന്നതാകുന്നു.
(ഡി) താലൂക്ക്‌ ആസ്ഥാനങ്ങളല്ലാത്ത സ്ഥലങ്ങളിലും ഏരിയകള്‍ രൂപീകരിക്കുന്നതിന്‌ അനുവാദം നല്‍കാന്‍ സംസ്ഥാനകമ്മിറ്റിക്ക്‌ അധികാരമുണ്ട്‌. എന്നാല്‍ ഇത്തരത്തില്‍ രൂപീകരിക്കുന്ന ഏരിയകളുടെ പ്രവര്‍ത്തനപരിധിയില്‍ 100ല്‍ കുറയാത്ത അംഗങ്ങള്‍ ഉണ്ടായിരിക്കണം. അത്തരം ഏരിയകളുടെ പ്രവര്‍ത്തനപരിധി നിര്‍ണ്ണയിക്കുന്നത്‌ ബന്ധപ്പെട്ട ജില്ലാ കമ്മിറ്റി ആയിരിക്കും. ഏതെങ്കിലും വര്‍ഷം മെമ്പര്‍ഷിപ്പ്‌ 100 ല്‍ കുറയുകയാണെങ്കില്‍ അത്തരം ഏരിയ പിരിച്ചുവിടാന്‍ ജില്ലാ കമ്മിറ്റിക്ക്‌ അധികാരമുണ്ടായിരിക്കും.
(ഇ) ജില്ലാ കേന്ദ്രത്തിന്റെ ആസ്ഥാനം റവന്യൂ ജില്ലാതലസ്ഥാനത്തായിരിക്കും.
(എഫ്‌) ഏരിയയുടെ ആസ്ഥാനം ജില്ലാക്കമ്മിറ്റി നിശ്ചയിക്കുന്നതാണ്‌.
5. അംഗത്വം
(എ) പോലീസ്‌ സേനയിലെ അംഗങ്ങളും ജയില്‍വകുപ്പിലെ എക്‌സിക്യൂട്ടീവ്‌ വിഭാഗം ജീവനക്കാരും വിദ്യാഭ്യാസ സബോര്‍ഡിനേറ്റ്‌ സര്‍വ്വീസില്‍പ്പെട്ട അദ്ധ്യാപകരും ഒഴികെ, കേരള സര്‍ക്കാര്‍ സര്‍വ്വീസിലെയും പ്രാദേശിക ഗവണ്‍മെന്റുകളിലെയും എല്ലാ നോണ്‍ ഗസറ്റഡ്‌ ജീവനക്കാരും പാര്‍ട്ട്‌ ടൈം കണ്ടിജന്‍സി ജീവനക്കാരും കാഷ്വല്‍ സ്വീപ്പര്‍മാരും അംഗത്വത്തിനര്‍ഹരാണ്‌.
(ബി) അംഗത്വത്തിനുള്ള അപേക്ഷ, ഈ നിയമാവലിക്കനുബന്ധമായി ചേര്‍ത്തിട്ടുള്ള ഫോറത്തില്‍, അപേക്ഷകന്‍ ജോലി ചെയ്യുന്ന സ്ഥലം ഉള്‍പ്പെട്ട ഏരിയ സെക്രട്ടറിക്ക്‌ സമര്‍പ്പിക്കേണ്ടതാണ്‌.
(സി) അപേക്ഷയോടൊപ്പം മെമ്പര്‍ഷിപ്പ്‌ ഫീസും നല്‍കിയിരിക്കണം.
(ഡി) കാരണം രേഖപ്പെടുത്തി അപേക്ഷകനെ അറിയിക്കണമെന്ന നിബന്ധനയ്‌ക്ക്‌ വിധേയമായി, തക്കതായ കാരണങ്ങള്‍ക്കു ഏതൊരപേക്ഷകന്റെയും അംഗത്വ അപേക്ഷ തിരസ്‌ക്കരിക്കാനുള്ള അധികാരം ഏരിയ കമ്മിറ്റിയില്‍ നിക്ഷിപ്‌തമാണ്‌.
(ഇ) മുകളില്‍ പറഞ്ഞ അധികാരമനുസരിച്ചുള്ള ഏരിയ കമ്മിറ്റിയുടെ തീരുമാനത്തില്‍ പരാതിയുള്ള അപേക്ഷകര്‍ക്ക്‌ ജില്ലാ കമ്മിറ്റിക്ക്‌ അപ്പീല്‍ ബോധിപ്പിക്കാവുന്നതാണ്‌. ജില്ലാ കമ്മിറ്റിയുടെ തീരുമാനത്തിനെതിരെ സംസ്ഥാനകമ്മിറ്റിക്ക്‌ രണ്ടാം അപ്പീല്‍ ബോധിപ്പിക്കാം. തീരുമാനം കൈപ്പറ്റിയ തീയതി തൊട്ട്‌ 15 ദിവസത്തിനകം ഇത്തരം അപ്പീലുകള്‍ ബന്ധപ്പെട്ട കമ്മിറ്റികള്‍ക്ക്‌ സമര്‍പ്പിച്ചിരിക്കണം. സംസ്ഥാന കമ്മിറ്റിയുടെ തീരുമാനം അന്തിമമായിരിക്കും.
(എഫ്‌) സംസ്ഥാനത്തെ ഏതെങ്കിലുമൊരു ഏരിയയില്‍ അംഗത്വമെടുത്തശേഷം മറ്റൊരു ഏരിയയിലേക്ക്‌ സ്ഥലംമാറ്റപ്പെടുകയോ ഡെപ്യൂട്ട്‌ ചെയ്യപ്പെടുകയോ ചെയ്യുന്ന പക്ഷം ആ ഏരിയയിലും അയാള്‍ക്ക്‌ ഒരംഗത്തിന്റെ എല്ലാ അധികാരാവകശങ്ങളോടെയും തുടരാവുന്നതാണ്‌.
(ജി) അംഗത്വത്തില്‍ നിന്ന്‌ നീക്കം ചെയ്യപ്പെടുകയോ മറ്റ്‌ വിധത്തില്‍ അംഗത്വം അവസാനിക്കുകയോ അംഗത്വത്തിന്‌ അയോഗ്യത കല്‍പ്പിക്കപ്പെടുകയോ ചെയ്യുന്നവരൊഴികെ ഏതൊരംഗത്തിനും അദ്ദേഹം അംഗമായ വര്‍ഷത്തിന്റെ തൊട്ടടുത്തവര്‍ഷം ആഗസ്റ്റ്‌ 31 വരെ അംഗത്തിന്റെ അധികാരാവകാശങ്ങള്‍ അനുഭവിക്കാവുന്നതാണ്‌.
(എച്ച്‌) നിയമാവലിയിലെ 7-ാം വകുപ്പിലെ (5) ഉപവകുപ്പ്‌ പ്രകാരം അംഗത്വം നഷ്‌ടപ്പെട്ടവര്‍ക്ക്‌ വീണ്ടും അംഗത്വം നല്‍കുന്നത്‌ സംസ്ഥാന കമ്മിറ്റിയുടെ മുന്‍കൂട്ടിയുള്ള അനുമതിയോടെ മാത്രമേ പാടുള്ളു.
6. വരിസംഖ്യ
പ്രവേശനാവസരത്തിലും അതിനുശേഷവും ഓരോ അംഗവും 10 രൂപ (പത്ത്‌) നിരക്കില്‍ വാര്‍ഷിക വരിസംഖ്യ നല്‍കേണ്ടതാണ്‌.
7. അംഗത്വം നഷ്‌ടപ്പെടല്‍
താഴെപ്പറയുന്ന ഏതെങ്കിലും കാരണത്താല്‍ അംഗത്വം സ്വമേധയാ നഷ്‌ടപ്പെടുന്നതായിരിക്കും.
1. സംഘടനാ പ്രവര്‍ത്തനത്തിന്റെ പേരില്‍ സര്‍ക്കാര്‍ സ്വീകരിക്കുന്ന ശിക്ഷണ നടപടികള്‍ (1) സര്‍വ്വീസില്‍ നിന്നും നീക്കം ചെയ്യല്‍ (2) നിര്‍ബ്ബന്ധിത പെന്‍ഷന്‍ (3) പിരിച്ചു വിടല്‍ എന്നിവയൊഴികെ 5 (എ) വകുപ്പ്‌ അനുസരിച്ചുള്ള അര്‍ഹത അവസാനിക്കുക.
2. 6-ാം വകുപ്പ്‌ അനുശാസിക്കുന്ന വാര്‍ഷികവരിസംഖ്യ അടയ്‌ക്കാതിരിക്കുക.
3. രേഖാമൂലം രാജിവയ്‌ക്കുക.
4. സര്‍വീസില്‍ നിന്നും പിരിയുക.
5. യൂണിയന്റെ അംഗത്വത്തില്‍ നിന്നു നീക്കം ചെയ്യപ്പെടുക.
8. അച്ചടക്കം
(എ) യാതൊരംഗവും യൂണിയന്റെ ഉദ്ദേശ്യലക്ഷ്യങ്ങള്‍ക്കോ നയപരിപാടികള്‍ക്കോ, തീരുമാനങ്ങള്‍ക്കോ വിരുദ്ധമായ യാതൊരുവിധ പ്രവര്‍ത്തനത്തിലും, പ്രത്യക്ഷമായോ, പരോക്ഷമായോ ഏര്‍പ്പെട്ടുകൂടാത്തതാകുന്നു.
(ബി) യൂണിയന്റെ അച്ചടക്കം ലംഘിക്കുന്ന ഒരംഗത്തിന്‌ താഴെപ്പറയുന്ന ഏതെങ്കിലും ശിക്ഷ നല്‍കാവുന്നതാണ്‌.
1. തെരഞ്ഞെടുക്കപ്പെട്ട സ്ഥാനങ്ങളില്‍ നിന്ന്‌ നീക്കം ചെയ്യല്‍.
2. ഒരു വര്‍ഷത്തില്‍ കവിയാത്ത ഒരു നിശ്ചിതകാലത്തേക്ക്‌ സസ്‌പെന്‍ഡ്‌ ചെയ്യല്‍.
3. യൂണിയന്റെ പ്രാഥമികാംഗത്വത്തില്‍ നിന്ന്‌ നീക്കം ചെയ്യല്‍.
(സി) ജില്ലാ കമ്മിറ്റിക്ക്‌ അതിന്റെ സ്വന്തം നിഗമനങ്ങളുടെ അടിസ്ഥാനത്തിലോ, ജില്ലയിലെ ഏതെങ്കിലും ഏരിയ കമ്മിറ്റിയോ ഏതെങ്കിലും അംഗമോ ഉന്നയിക്കുന്ന വ്യക്തമായ ആരോപണങ്ങളുടെ അടിസ്ഥാനത്തിലോ യൂണിയന്റെ ഏതെങ്കിലും അംഗത്തിന്റെയോ/ഏരിയാ കമ്മിറ്റി അംഗത്തിന്റെയോ/ജില്ലാ കൗണ്‍സില്‍ അംഗത്തിന്റെയോ/ജില്ലാ കമ്മിറ്റി അംഗത്തിന്റെയോ/ജില്ലാ സെക്രട്ടേറിയറ്റ്‌ അംഗത്തിന്റെയോ/ജില്ലാ ഭാരവാഹിയുടെയോ/ഏരിയാ ഭാരവാഹിയുടേയോ പേരില്‍, ആരോപണവിധേയനാകുന്ന ആള്‍ക്കു തന്റെ നിലപാട്‌ വിശദീകരിക്കാനുള്ള അവസരം കൊടുത്തുകൊണ്ട്‌, 8 ബി വകുപ്പില്‍ നിര്‍ദ്ദേശിച്ചിരിക്കുന്ന ശിക്ഷ ചുമത്താവുന്നതാണ്‌.
ജില്ലാ സെക്രട്ടേറിയറ്റ്‌ അംഗങ്ങള്‍ക്കും ജില്ലാ ഭാരവാഹികള്‍ക്കുമെതിരെ അച്ചടക്ക നടപടി സ്വീകരിക്കുന്നത്‌ സംസ്ഥാന കമ്മിറ്റിയുടെ മുന്‍കൂട്ടിയുള്ള അനുവാദത്തോടെയായിരിക്കണം. ഇങ്ങനെ സ്വീകരിക്കുന്ന നടപടികള്‍ക്കെതിരെയുള്ള അപ്പീല്‍ സംസ്ഥാന കമ്മിറ്റിക്കുതന്നെ പരിശോധിക്കാവുന്നതാണ്‌.
(ഡി) ജില്ലാ കമ്മിറ്റിയുടെ തീരുമാനത്തിന്‍മേലുള്ള അപ്പീല്‍ അത്തരം തീരുമാനം കൈപ്പറ്റി 15 (പതിനഞ്ച്‌) ദിവസത്തിനകം സംസ്ഥാന കമ്മിറ്റിക്ക്‌ സമര്‍പ്പിക്കേണ്ടതും അതിനുമേല്‍ സംസ്ഥാന കമ്മിറ്റിയുടെ തീരുമാനം അന്തിമമായിരിക്കുന്നതുമാകുന്നു.
(ഇ) ആരോപണ വിധേയനായ അംഗത്തിന്‌/ എല്ലാ തലത്തിലുമുള്ള തെരഞ്ഞെടുക്കപ്പെട്ട സമിതിയിലുള്‍പ്പെട്ടവര്‍ക്ക്‌ തന്റെ നിലപാട്‌ വിശദീകരിക്കുന്നതിന്‌ ന്യായമായ അവസരം നല്‍കിയശേഷം സംസ്ഥാന കമ്മിറ്റിക്കു 8 (ബി) വകുപ്പില്‍ നിര്‍ദ്ദേശിച്ച ശിക്ഷ ചുമത്താവുന്നതാണ്‌.
(എഫ്‌) സംസ്ഥാന കമ്മിറ്റിയുടെ തീരുമാനത്തിന്മേലുള്ള അപ്പീല്‍, തീരുമാനം കൈപ്പറ്റി 15 (പതിനഞ്ച്‌) ദിവസത്തിനകം സംസ്ഥാന കൗണ്‍സിലിന്‌ സമര്‍പ്പിക്കേണ്ടതും കൗണ്‍സിലിന്റെ തീരുമാനം അന്തിമമായിരിക്കുന്നതുമാണ്‌.
(ജി) സംസ്ഥാന കമ്മിറ്റിക്ക്‌ അതിന്റെ അംഗസംഖ്യയുടെ മൂന്നില്‍ രണ്ടു വോട്ടിന്റെ ഭൂരിപക്ഷത്തോടെ ഏതെങ്കിലും സംസ്ഥാനകമ്മിറ്റിയംഗത്തിന്റെ മേല്‍ 8 (ബി) വകുപ്പില്‍ അനുശാസിക്കുന്ന ശിക്ഷ ചുമത്താവുന്നതാണ്‌. ഇത്തരം നടപടിക്കു സംസ്ഥാന കൗണ്‍സിലിന്റെ അംഗീകാരം നേടേണ്ടതാകുന്നു.
(എച്ച്‌) ജനറല്‍ ബോഡിക്കോ കൗണ്‍സിലിനോ ബന്ധപ്പെട്ട കമ്മിറ്റിയുടെ അംഗങ്ങളിലോ ഔദ്യോഗിക ഭാരവാഹികളിലോപെട്ട ഏതൊരാളെയും ഹാജരായ അംഗങ്ങളില്‍ മൂന്നില്‍ രണ്ടു വോട്ടു ഭൂരിപക്ഷത്തോടെ, തല്‍സ്ഥാനങ്ങളില്‍ നിന്നും നീക്കം ചെയ്യാവുന്നതാണ്‌.
(ഐ) സംസ്ഥാന കമ്മിറ്റിയിലെ ഏതെങ്കിലും അംഗത്തിന്റെയോ ഔദ്യോഗിക ഭാരവാഹിയുടെയോ മേല്‍ ശിക്ഷ ചുമത്താന്‍ ഏതെങ്കിലും ജില്ലാ കമ്മിറ്റിക്കോ, ജില്ലാ കമ്മിറ്റിയിലെ ഏതെങ്കിലും അംഗത്തിന്റെയോ ഔദ്യോഗിക ഭാരവാഹിയുടെയോ മേല്‍ ശിക്ഷ ചുമത്താന്‍ ഏതെങ്കിലും ഏരിയാ കമ്മിറ്റിക്കോ, അധികാരമുണ്ടായിരിക്കുന്നതല്ല.
9. അതിലംഘനം (സൂപ്പര്‍സെഷന്‍)
(എ) 8 (എ) വകുപ്പില്‍ പരാമര്‍ശിച്ച അച്ചടക്കലംഘനത്തിനോ മറ്റ്‌ മതിയായ കാരണങ്ങള്‍ക്കോ, ഏതെങ്കിലും ജില്ലാക്കമ്മിറ്റിയുടെയോ ഏരിയാ കമ്മിറ്റിയുടെയോ, പ്രവര്‍ത്തനം ഏറ്റെടുത്ത്‌ നടത്താന്‍ സംസ്ഥാന കമ്മിറ്റിക്ക്‌ അധികാരമുണ്ടായിരിക്കും. യൂണിയന്റെ താല്‍പ്പര്യസംരക്ഷണാര്‍ത്ഥം സംസ്ഥാന കമ്മിറ്റി ഉചിതമായ നടപടികള്‍ സ്വീകരിക്കേണ്ടതാണ്‌.
(ബി) ഇത്തരത്തിലുള്ള ജില്ലാ കമ്മിറ്റിയുടെയോ ഏരിയാ കമ്മിറ്റിയുടെയോ ദൈനംദിന പ്രവര്‍ത്തനങ്ങള്‍ നടത്തുന്നതിന്‌ സംസ്ഥാന കമ്മിറ്റിക്ക്‌ ഇടക്കാല സംവിധാനങ്ങള്‍ ഉണ്ടാക്കാവുന്നതാണ്‌.
(സി) അതിലംഘനത്തിന്റെ (ഏറ്റെടുക്കുന്ന) തീയതിതൊട്ട്‌ നാല്‌ മാസത്തിനകം പുതിയ കമ്മിറ്റികളുണ്ടാക്കാന്‍ നടപടിയെടുക്കേണ്ടതു സംസ്ഥാനകമ്മിറ്റിയുടെ ചുമതലയാണ്‌.
10. നിര്‍വ്വാഹക-ഭരണ സമിതികള്‍
(എ) ഏരിയ: കാര്യനിര്‍വ്വഹണം ഏരിയാ കമ്മിറ്റിയില്‍ നിക്ഷിപ്‌തമായിരിക്കും.
1. ഏരിയയുടെ അധികാരപരിധിയില്‍ ജോലിചെയ്യുന്ന യൂണിയന്‍ മെമ്പര്‍മാരില്‍ നിന്നും തെരഞ്ഞെടുക്കപ്പെടുന്ന ഒരു പ്രസിഡന്റ്‌, രണ്ടു വൈസ്‌ പ്രസിഡന്റുമാര്‍, ഒരു സെക്രട്ടറി, രണ്ട്‌ ജോയിന്റ്‌ സെക്രട്ടറിമാര്‍, ഒരു ഖജാന്‍ജി എന്നിവരും ഔദ്യോഗിക ഭാരവാഹികള്‍ക്കു പുറമെ പതിനാലില്‍ കവിയാത്ത അംഗങ്ങളും അടങ്ങുന്നതായിരിക്കും ഏരിയാ കമ്മിറ്റി.
2. ഏരിയായിലെ അംഗങ്ങള്‍, വാര്‍ഷിക തിരഞ്ഞെടുപ്പ്‌ വേളയില്‍, ഓരോ അന്‍പത്‌ അംഗങ്ങള്‍ക്കും ഇരുപത്തിയഞ്ച്‌ പേരിലധികരിക്കുന്ന ശേഷഭാഗത്തിനും, ഒരു പ്രതിനിധിയെന്ന തോതില്‍ ജില്ലാ കൗണ്‍സിലര്‍മാരെ തെരഞ്ഞെടുക്കണം.
(ബി) ജില്ല: ജില്ലാ കേന്ദ്രത്തിന്റെ കാര്യനിര്‍വ്വഹണം ജില്ലാക്കമ്മിറ്റിയില്‍ നിക്ഷിപ്‌തമായിരിക്കും.
1. ഏരിയകളില്‍ നിന്നും തെരഞ്ഞെടുക്കപ്പെടുന്ന ജില്ലാ കൗണ്‍സിലര്‍മാര്‍ ഉള്‍പ്പെട്ടതാണ്‌ ജില്ലാ കൗണ്‍സില്‍.
2. ജില്ലാ കൗണ്‍സിലിന്റെ ആദ്യയോഗത്തില്‍ വച്ച്‌ തെരഞ്ഞെടുക്കപ്പെടുന്ന ഒരു പ്രസിഡന്റ്‌, രണ്ട്‌ വൈസ്‌ പ്രസിഡന്റുമാര്‍, ഒരു സെക്രട്ടറി, രണ്ട്‌ ജോയിന്റ്‌ സെക്രട്ടറിമാര്‍, ഒരു ഖജാന്‍ജി എന്നിവരും, ഔദ്യോഗിക ഭാരവാഹികള്‍ക്കു പുറമെ ജില്ലാ കൗണ്‍സില്‍ അംഗങ്ങളില്‍ നിന്നും തെരഞ്ഞെടുക്കപ്പെടുന്ന താഴെപ്പറയും പ്രകാരമുള്ള എണ്ണത്തില്‍ കവിയാതെയുള്ള അംഗങ്ങളും അടങ്ങുന്നതായിരിക്കും ജില്ലാ കമ്മിറ്റി.
1) 6000 മെമ്പര്‍ഷിപ്പ്‌ വരെയുള്ള ജില്ലകളില്‍ 24.
2) 10000 മെമ്പര്‍ഷിപ്പ്‌ വരെയുള്ള ജില്ലകളില്‍ 30.
3) 10000 ല്‍ അധികം മെമ്പര്‍ഷിപ്പുള്ള ജില്ലകളില്‍ 36.
ഔദ്യോഗിക ഭാരവാഹികളും ജില്ലാ കമ്മിറ്റിയംഗങ്ങളില്‍ നിന്നും ജില്ലാ കൗണ്‍സില്‍ തെരഞ്ഞെടുക്കുന്ന താഴെപറയും പ്രകാരമുള്ള എണ്ണത്തില്‍ കവിയാതെയുള്ള അംഗങ്ങളും അടങ്ങുന്ന ഒരു ജില്ലാ സെക്രട്ടേറിയറ്റ്‌ ഉണ്ടായിരിക്കുന്നതാണ്‌.
1) 6000 മെമ്പര്‍ഷിപ്പ്‌ വരെയുള്ള ജില്ലകളില്‍ 6.
2) 10000 മെമ്പര്‍ഷിപ്പ്‌ വരെയുള്ള ജില്ലകളില്‍ 8.
3) 10000 ല്‍ അധികം മെമ്പര്‍ഷിപ്പുള്ള ജില്ലകളില്‍10.
3. ജില്ലാ കൗണ്‍സിലില്‍ നിന്ന്‌ ജില്ലയിലെ ഓരോ 200 അംഗങ്ങള്‍ക്കും 100 പേരില്‍ അധികം വരുന്ന ശേഷം ഭാഗത്തിനും ഒന്ന്‌ എന്ന തോതില്‍, സംസ്ഥാന കൗണ്‍സിലര്‍മാരെ ജില്ലാകൗണ്‍സില്‍ തെരഞ്ഞെടുക്കുന്നതാകുന്നു.
(സി) സംസ്ഥാനം: യൂണിയന്റെ കാര്യനിര്‍വ്വഹണം സംസ്ഥാന കമ്മിറ്റിയില്‍ നിക്ഷിപ്‌തമായിരിക്കും.
1. ജില്ലാ കൗണ്‍സിലുകളില്‍ നിന്നും തെരഞ്ഞെടുക്കപ്പെടുന്ന സംസ്ഥാനകൗണ്‍സിലര്‍മാരടങ്ങിയതാണ്‌ സംസ്ഥാന കൗണ്‍സില്‍. സംസ്ഥാന കൗണ്‍സിലാണ്‌ യൂണിയന്റെ പരമാധികാരസഭ.
2. സംസ്ഥാന കൗണ്‍സിലിന്റെ ആദ്യയോഗത്തില്‍ വച്ച്‌ സംസ്ഥാന കൗണ്‍സില്‍ മെമ്പര്‍മാരില്‍ നിന്നും തെരഞ്ഞെടുക്കുന്ന ഒരു പ്രസിഡന്റ്‌, നാല്‌ വൈസ്‌ പ്രസിഡന്റുമാര്‍, ഒരു ജനറല്‍ സെക്രട്ടറി, നാല്‌ സെക്രട്ടറിമാര്‍, ഒരു ഖജാന്‍ജി എന്നിവരും, ഔദ്യോഗിക ഭാരവാഹികള്‍ക്കു പുറമെ അറുപത്‌ അംഗങ്ങളും അടങ്ങുന്ന എഴുപത്തി ഒന്നില്‍ അധികരിക്കാത്ത ഒരു സംസ്ഥാന കമ്മിറ്റി ഉണ്ടായിരിക്കുന്നതാണ്‌.
3. ഔദ്യോഗിക ഭാരവാഹികളും സംസ്ഥാന കമ്മിറ്റി മെമ്പര്‍മാരില്‍ നിന്നും സംസ്ഥാന കൗണ്‍സില്‍ തെരഞ്ഞെടുക്കുന്ന പന്ത്രണ്ടില്‍ കവിയാത്ത അംഗങ്ങളും ഉള്‍ക്കൊള്ളുന്ന ഇരുപത്തിമൂന്നില്‍ അധികരിക്കാത്ത ഒരു സംസ്ഥാന സെക്രട്ടറിയേറ്റ്‌ ഉണ്ടായിരിക്കന്നതാണ്‌.
11. കമ്മിറ്റികളിലെയും കൗണ്‍സിലുകളിലെയും
അംഗത്വം നഷ്‌ടപ്പെടല്‍
ഏതെങ്കിലും ഒരു കമ്മിറ്റിയിലെയോ കൗണ്‍സിലിലെയോ അംഗമോ ഔദ്യോഗിക ഭാരവാഹിയോ;
(എ) സ്ഥലംമാറ്റമായി ആ കമ്മിറ്റിയുടെയോ കൗണ്‍സിലിന്റെയോ പരിധിക്കു പുറത്തുള്ള ഒരു പ്രദേശത്ത്‌ ജോലിയില്‍ ചേര്‍ന്നാല്‍ ബന്ധപ്പെട്ട കമ്മിറ്റിയിലെ, കൗണ്‍സിലിലെ, അംഗത്വവും ഭാരവാഹിത്വവും നഷ്‌ടപ്പെടുന്നതാണ്‌.
എന്നാല്‍ യൂണിയന്റെ ഉത്തമ താല്‍പര്യം പരിഗണിച്ച്‌ സംസ്ഥാന കൗണ്‍സിലിന്റെ അംഗീകാരത്തിന്‌ വിധേയമായി സംസ്ഥാനക്കമ്മിറ്റിക്ക്‌ ഈ വ്യവസ്ഥ നടപ്പാക്കുന്നത്‌ രണ്ടു യൂണിയന്‍ വര്‍ഷം അധികരിക്കാത്ത കാലത്തേയ്‌ക്ക്‌ നീട്ടിവയ്‌ക്കാവുന്നതാണ്‌.
(ബി) താന്‍ പ്രതിനിധാനം ചെയ്യുന്ന കമ്മിറ്റിയുടെയോ കൗണ്‍സിലിന്റെയോ തുടര്‍ച്ചയായ മൂന്നു യോഗങ്ങളില്‍ ഹാജരാകാതിരുന്നാല്‍ ഭാരവാഹിത്വമോ അംഗത്വമോ നഷ്‌ടപ്പെടുന്നതാണ്‌.
(ബി) ഉപവകുപ്പ്‌ അനുസരിച്ച്‌ സ്ഥാനം നഷ്‌ടപ്പെടുന്ന ആള്‍ ന്യായമായ കാരണങ്ങളുന്നയിച്ച്‌ അപേക്ഷിക്കുകയാണെങ്കില്‍ നഷ്‌ടപ്പെട്ട സ്ഥാനം തിരിച്ചുനല്‍കാന്‍, അതത്‌ കമ്മിറ്റികള്‍ക്കും കൗണ്‍സിലുകള്‍ക്കും അധികാരമുണ്ടായിരിക്കും.
12. ഒഴിവുകള്‍ നികത്തല്‍
(എ) ഔദ്യോഗിക ഭാരവാഹികളുടെയും ജില്ലാ കൗണ്‍സിലര്‍മാരുടെയും സംസ്ഥാന കൗണ്‍സിലര്‍മാരുടെയും ഒഴിവുകള്‍ തെരഞ്ഞെടുപ്പ്‌ വഴി നികത്തുന്നതായിരിക്കും.
(ബി) സംസ്ഥാന-ജില്ലാ-ഏരിയാ കമ്മിറ്റി അംഗങ്ങളുടെ ഒഴിവുകള്‍ അതത്‌ കമ്മിറ്റികള്‍ കോ-ഓപ്‌ഷന്‍ വഴി നികത്തും. ഇങ്ങനെ കോ-ഓപ്‌റ്റ്‌ ചെയ്യുന്ന അംഗങ്ങളുടെ എണ്ണം ഒരു യൂണിയന്‍ വര്‍ഷത്തില്‍ സംസ്ഥാന ജില്ലാ കമ്മിറ്റികളിലാണെങ്കില്‍ മൂന്നിലും ഏരിയ കമ്മിറ്റികളിലാണെങ്കില്‍ അഞ്ചിലും കവിയരുത്‌.
13. കാലാവധി
(എ) ഏരിയ, ജില്ലാ, സംസ്ഥാന കമ്മിറ്റികളിലെ ഔദ്യോഗിക ഭാരവാഹികളും അംഗങ്ങളും അടുത്ത തിരഞ്ഞെടുപ്പുവരെ തല്‍സ്ഥാനങ്ങള്‍ വഹിക്കുന്നതായിരിക്കും.
(ബി) സംസ്ഥാന – ജില്ലാ കൗണ്‍സിലുകള്‍ അതിന്റെ വാര്‍ഷികയോഗങ്ങള്‍ കഴിയുന്നതോടെ നിലവിലില്ലാതാകും. എന്നാല്‍ ഔദ്യോഗിക ഭാരവാഹികള്‍ തങ്ങളുടെ പിന്തുടര്‍ച്ചക്കാര്‍ തിരഞ്ഞെടുക്കപ്പെടുന്നതുവരെ സ്ഥാനങ്ങളില്‍ തുടരുന്നതായിരിക്കും.
14. ചുമതലകളും പ്രവര്‍ത്തനങ്ങളും.
എ) സംസ്ഥാന കൗണ്‍സില്‍
1. യൂണിയന്റെ പരമാധികാരസഭ സംസ്ഥാന കൗണ്‍സില്‍ ആയിരിക്കുന്നതും സംസ്ഥാന കൗണ്‍സിലിന്റെ തീരുമാനങ്ങള്‍ എല്ലാ കാര്യങ്ങളിലും അന്തിമമായിരിക്കുന്നതുമാകുന്നു.
2. യൂണിയന്റെ നയപരിപാടികള്‍ ആവിഷ്‌ക്കരിക്കുന്നത്‌ സംസ്ഥാന കൗണ്‍സില്‍ ആയിരിക്കും.
3. സംസ്ഥാന കമ്മിറ്റി, സംസ്ഥാന കമ്മിറ്റിയുടെ അംഗീകാരമുള്ള പ്രത്യേക കമ്മിറ്റികള്‍, ട്രസ്റ്റുകള്‍, പ്രസിദ്ധീകരണങ്ങള്‍ എന്നിവയുടെ വാര്‍ഷിക റിപ്പോര്‍ട്ടുകളും ഓഡിറ്റു ചെയ്‌ത കണക്കുകളും സംസ്ഥാന കൗണ്‍സില്‍ പരിഗണിക്കുന്നതും അംഗീകരിക്കുന്നതുമാകുന്നു.
4. സംസ്ഥാന കൗണ്‍സില്‍ അതിന്റെ ആദ്യയോഗത്തില്‍ 10 (സി) (2) വകുപ്പില്‍ നിര്‍ദ്ദേശിച്ചവിധം സംസ്ഥാനക്കമ്മിറ്റിയിലേക്കുള്ള ഔദ്യോഗിക ഭാരവാഹികളെയും അംഗങ്ങളെയും തിരഞ്ഞെടുക്കുന്നതും യൂണിയന്‍ അംഗങ്ങളില്‍ നിന്ന്‌ രണ്ട്‌ പേരില്‍ കുറയാത്ത ഓഡിറ്റര്‍മാരെയും തിരഞ്ഞെടുക്കുന്നതുമാകുന്നു.
5. യൂണിയന്റെ താല്‍പര്യങ്ങള്‍ക്ക്‌ ആവശ്യമെന്നുതോന്നുമ്പോഴോ ഭരണപരമോ ഭരണഘടനാപരമോ ആയ കാരണങ്ങളാലോ യൂണിയന്റെ ഏതെങ്കിലും കൗണ്‍സിലുകളിലോ കമ്മിറ്റികളിലോ നിക്ഷിപ്‌തമായിട്ടുള്ളതോ അധികാരപ്പെടുത്തിയിട്ടുള്ളതോ ആയ അധികാരങ്ങള്‍ സംസ്ഥാന കൗണ്‍സിലിന്‌ ഏറ്റെടുത്ത്‌ നടത്താവുന്നതാണ്‌.
ബി) സംസ്ഥാന കമ്മിറ്റി
1. യൂണിയന്റെ കാര്യനിര്‍വ്വഹണച്ചുമതല സംസ്ഥാന കമ്മിറ്റിക്കായിരിക്കും.
2. സംസ്ഥാന കൗണ്‍സിലിന്റെ രണ്ട്‌ യോഗങ്ങള്‍ക്കിടയില്‍ നിയമാവലി 14 (എ), (3), (4), (5) വകുപ്പുകളില്‍പ്പെട്ടവയൊഴിച്ചുള്ള സംസ്ഥാന കൗണ്‍സിലിന്റെ അധികാരങ്ങള്‍ സംസ്ഥാനകമ്മിറ്റിക്ക്‌ കൈകാര്യം ചെയ്യാവുന്നതാകുന്നു. അങ്ങനെയുള്ള പ്രവര്‍ത്തനങ്ങളുടെ ഒരു റിപ്പോര്‍ട്ട്‌ സംസ്ഥാന കൗണ്‍സിലിന്റെ അടുത്ത യോഗത്തില്‍ സമര്‍പ്പിക്കേണ്ടതാണ്‌.
3. സംസ്ഥാന കമ്മിറ്റിക്ക്‌ സംസ്ഥാന കൗണ്‍സിലിനോട്‌ കൂട്ടായ ഉത്തരവാദിത്വം ഉണ്ടായിരിക്കും.
4. സംസ്ഥാന കൗണ്‍സില്‍ വ്യക്തമായി അധികാരപ്പെടുത്തിയതും സാഹചര്യങ്ങള്‍ക്കനുസൃതമായ പ്രവര്‍ത്തനങ്ങള്‍ സംസ്ഥാനക്കമ്മിറ്റി ഏറ്റെടുത്ത്‌ നടത്തേണ്ടതാണ്‌.
5. യൂണിയന്റെ പ്രവര്‍ത്തനത്തിനാവശ്യമായ ഫണ്ടുകള്‍ കമ്മിറ്റിക്ക്‌ സ്വരൂപിക്കാവുന്നതാണ്‌.
6. കമ്മിറ്റിക്ക്‌ പത്രമാസികകള്‍ പ്രസിദ്ധീകരിക്കാവുന്നതും ഏതെങ്കിലും ജില്ലാ കമ്മിറ്റികള്‍ക്കോ ഏരിയാ കമ്മിറ്റിക ള്‍ക്കോ പ്രസിദ്ധീകരണം നടത്തുന്നതിന്‌ അനുവാദം കൊടുക്കാവുന്നതാണ്‌.
7. സബ്‌ കമ്മിറ്റികള്‍, പ്രത്യേക കമ്മിറ്റികള്‍, ട്രസ്റ്റുകള്‍ എന്നിവ രൂപീകരിക്കുവാനും അവയുടെ ശരിയായ നടത്തിപ്പിനും ഭരണത്തിനും ആവശ്യമായ ചട്ടങ്ങള്‍ ഉണ്ടാക്കുന്നതിനും അതിനധികാരമുണ്ടായിരിക്കും.
8. യൂണിയന്റെ ഉദ്ദേശശ്യലക്ഷ്യങ്ങള്‍ക്കനുസൃതവും അതിന്റെ സുഗമമായ പ്രവര്‍ത്തനത്തിനും ആവശ്യമായ മറ്റ്‌ പ്രവര്‍ത്തനങ്ങളും കമ്മിറ്റി നടത്തുന്നതായിരിക്കും.
9. യൂണിയന്‍ സംസ്ഥാന കമ്മിറ്റി ചെലവാക്കിയതോ സംസ്ഥാനകമ്മിറ്റിക്കുവേണ്ടി ചെലവാക്കപ്പെട്ടതോ ആയ സംഖ്യകള്‍ക്കുള്ള എല്ലാ വൗച്ചറുകളും സൂക്ഷ്‌മപരിശോധന നടത്തുവാനും പാസ്സാക്കുവാനുമുള്ള അധികാരം സംസ്ഥാന കമ്മിറ്റിക്കായിരിക്കും.
10. ജനറല്‍ സെക്രട്ടറിയെ യൂണിയന്‍ പ്രവര്‍ത്തനങ്ങളില്‍ സഹായിക്കുവാന്‍ വേതനത്തോടുകൂടിയതോ മറ്റുവിധത്തിലോ ആവശ്യമായ എസ്റ്റാബ്ലിഷ്‌മെന്റിന്‌ അനുമതി നല്‍കാന്‍ സംസ്ഥാന കമ്മിറ്റിക്കധികാരമുണ്ട്‌.
11. ജനറല്‍ സെക്രട്ടറിയുടെ വാര്‍ഷിക റിപ്പോര്‍ട്ടും ഓഡിറ്ററുടെ അഭിപ്രായ നിര്‍ദ്ദേശങ്ങള്‍ക്കുമുള്ള മറുപടികളോടുകൂടി ഖജാന്‍ജി സമര്‍പ്പിക്കുന്ന ഓഡിറ്റ്‌ ചെയ്‌ത വരവ്‌ – ചെലവ്‌ കണക്കുകളും ആവശ്യമായ മാറ്റങ്ങളോടെ കമ്മിറ്റി അംഗീകരിക്കേണ്ടതാണ്‌.
12. പൊതുഫണ്ട്‌ ഒഴികെയുള്ള ഫണ്ടുകള്‍ കൈകാര്യം ചെയ്യുവാന്‍ പ്രത്യേക കമ്മിറ്റികള്‍, സബ്‌ കമ്മിറ്റികള്‍, ട്രസ്റ്റുകള്‍, പ്രസിദ്ധീകരണങ്ങള്‍ എന്നിവയെ അധികാരപ്പെടുത്താന്‍ സംസ്ഥാനകമ്മിറ്റിക്ക്‌ അധികാരമുണ്ടായിരിക്കും. അങ്ങനെ കൊടുക്കപ്പെടുന്ന അധികാരങ്ങള്‍ വേണ്ടെന്നു വയ്‌ക്കാനും സംസ്ഥാന കമ്മിറ്റിക്ക്‌ അധികാരമുണ്ടായിരിക്കും.
സി) പ്രസിഡന്റ്‌
1. പ്രസിഡന്റിന്‌ യൂണിയന്‍ കാര്യങ്ങളില്‍ പൊതുവായ നിയന്ത്രണമുണ്ടായിരിക്കും.
2. സംസ്ഥാന കൗണ്‍സിലിന്റെയും സംസ്ഥാന കമ്മിറ്റിയുടെയും യോഗങ്ങളില്‍ അദ്ദേഹം അദ്ധ്യക്ഷത വഹിക്കും.
3. സംസ്ഥാന കൗണ്‍സിലും സംസ്ഥാന കമ്മിറ്റിയും അധികാരപ്പെടുത്തുന്ന മറ്റു കാര്യങ്ങള്‍ അദ്ദേഹം നിര്‍വ്വഹിക്കും.
ഡി) വൈസ്‌ പ്രസിഡന്റുമാര്‍
1. പ്രസിഡന്റിന്റെ അഭാവത്തില്‍, കമ്മിറ്റി തീരുമാനിക്കുന്നതനുസരിച്ച്‌, വൈസ്‌ പ്രസിഡന്റുമാരിലൊരാള്‍ പ്രസിഡന്റിന്റെ അധികാരങ്ങളും ചുമതലകളും നിര്‍വ്വഹിക്കുന്നതാണ്‌.
ഇ) ജനറല്‍ സെക്രട്ടറി
1. ജനറല്‍ സെക്രട്ടറി യൂണിയന്റെ കാര്യനിര്‍വ്വഹണ മേധാവിയായിരിക്കുന്നതും കാര്യനിര്‍വ്വഹണത്തിന്‌ ഉത്തരവാദിയായിരിക്കുന്നതുമാകുന്നു.
2. അടിയന്തിര ഘട്ടങ്ങളില്‍ അദ്ദേഹത്തിന്‌ പ്രസിഡന്റിനോടും, ബന്ധപ്പെടുവാന്‍ കഴിയുന്ന സംസ്ഥാന കമ്മിറ്റിയംഗങ്ങളോടും, ആലോചിച്ച്‌ യുക്തമായ നടപടികള്‍ സ്വീകരിക്കാവുന്നതാണ്‌. അത്തരം പ്രവര്‍ത്തനത്തിന്റെ റിപ്പോര്‍ട്ട്‌ 15 ദിവസങ്ങള്‍ക്കുള്ളിലോ, സംസ്ഥാന കമ്മിറ്റിയുടെ അടുത്ത യോഗത്തിലോ, ഏതാണ്‌ ആദ്യമെങ്കില്‍ അപ്പോള്‍, സംസ്ഥാന കമ്മിറ്റിക്കു സമര്‍പ്പിക്കേണ്ടതാണ്‌.
3. ആവശ്യമെന്ന്‌ തോന്നുന്ന സന്ദര്‍ഭങ്ങളില്‍ അദ്ദേഹത്തിന്‌ യൂണിയന്‍ കേന്ദ്രങ്ങള്‍ സന്ദര്‍ശിക്കാവുന്നതാണ്‌.
4. യൂണിയന്റെ ദൈനംദിന ചെലവുകള്‍ നിര്‍വ്വഹിക്കുന്നതിനായി അദ്ദേഹത്തിന്‌ അയ്യായിരം രൂപ സ്ഥിരം മുന്‍കൂറായി (അഡ്വാന്‍സ്‌) കൈവശം വയ്‌ക്കാവുന്നതാകുന്നു.
5. സംസ്ഥാന കമ്മിറ്റിയുടെ അംഗീകാരത്തിന്‌ വിധേയമായി എസ്റ്റാബ്ലിഷ്‌മെന്റിലേയ്‌ക്ക്‌ നിയമനം നടത്തുവാനും അവരുടെ സേവനം വ്യവസ്ഥപ്പെടുത്തുവാനും അവരുടെ സേവനം അവസാനിപ്പിക്കുവാനും അദ്ദേഹത്തിന്‌ അധികാരം ഉണ്ടായിരിക്കും.
6. യൂണിയനാഫീസിന്റെ ചിട്ടയായ പ്രവര്‍ത്തനത്തിനും യൂണിയന്‍ റിക്കാര്‍ഡുകളുടെ സൂക്ഷിപ്പിനും അദ്ദേഹം ഉത്തരവാദിയായിരിക്കും.
എഫ്‌) സെക്രട്ടറിമാര്‍
1. സംഘടനാ ചുമതലകളും ജോലികളും നിര്‍വ്വഹിക്കുന്നതില്‍ ജനറല്‍ സെക്രട്ടറിയെ സെക്രട്ടറിമാര്‍ സഹായിക്കുന്നതാണ്‌.
2. ജനറല്‍ സെക്രട്ടറിയുടെ അഭാവത്തില്‍ അദ്ദേഹത്തിന്റെ അധികാരങ്ങള്‍ വിനിയോഗിക്കുന്നതിന്‌ സെക്രട്ടറിമാരില്‍ ഒരാളെ സംസ്ഥാന കമ്മിറ്റിക്ക്‌ അധികാരപ്പെടുത്താവുന്നതാണ്‌.
3. സംസ്ഥാന കൗണ്‍സിലോ സംസ്ഥാന കമ്മിറ്റിയോ അധികാരപ്പെടുത്തുന്ന കാര്യങ്ങള്‍ സെക്രട്ടറിമാര്‍ നിര്‍വ്വഹിക്കുന്നതാണ്‌.
ജി) ട്രഷറര്‍
1. യൂണിയന്റെ എല്ലാവിധ പണമിടപാടുകള്‍ക്കും ട്രഷറര്‍ ഉത്തരവാദിയായിരിക്കും.
2. യൂണിയന്റെ സാമ്പത്തിക നിലയെക്കുറിച്ച്‌ കാലാകാലങ്ങളില്‍ അദ്ദേഹം സംസ്ഥാനക്കമ്മിറ്റിയെ ധരിപ്പിക്കുന്നതാണ്‌.
3. അദ്ദേഹം യൂണിയന്റെ വാര്‍ഷിക വരവ്‌ – ചെലവ്‌ കണക്കുകള്‍ ഉണ്ടാക്കുന്നതും ഓഡിറ്റ്‌ ചെയ്‌ത കണക്ക്‌ സമര്‍പ്പിക്കുന്നുതമാണ്‌.
4. സംസ്ഥാന കമ്മിറ്റി നിര്‍ദ്ദേശിക്കുന്ന മറ്റ്‌ കണക്കുകളും അദ്ദേഹം സൂക്ഷിക്കേണ്ടതാകുന്നു.
15. എ) ജില്ലാ കൗണ്‍സില്‍
ജില്ലാ കേന്ദ്രങ്ങള്‍ സംസ്ഥാന കൗണ്‍സിലിന്റെയും സംസ്ഥാന കമ്മിറ്റിയുടേയും കീഴ്‌ഘടകങ്ങളാകുന്നു.
1. ജില്ലാ കൗണ്‍സില്‍, ഈ നിയമാവലിയില്‍ അതിന്‌ പ്രത്യേകമായി നിര്‍ദ്ദേശിച്ചിട്ടുള്ള അധികാരങ്ങള്‍ വിനിയോഗിക്കുന്നതും, ചുമതലകള്‍ നിര്‍വ്വഹിക്കേണ്ടതുമാണ്‌.
2. അത്‌ യൂണിയന്റെ നയപരിപാടികളും സംസ്ഥാന കൗണ്‍സിലിന്റെയും സംസ്ഥാന കമ്മിറ്റിയുടെയും തീരുമാനങ്ങളും നിര്‍ദ്ദേശങ്ങളും നടപ്പാക്കുന്നതാകുന്നു.
3. ജില്ലാ കൗണ്‍സില്‍ സംസ്ഥാന കൗണ്‍സിലിലേയ്‌ക്ക്‌ തെരഞ്ഞെടുത്തതും ജില്ലാ കൗണ്‍സിലില്‍ തുടരുന്നയാളുമായ ഒരു സംസ്ഥാന കൗണ്‍സില്‍ അംഗത്തെ ഭൂരിപക്ഷ വോട്ടുകളുടെയടിസ്ഥാനത്തിലും ആ കൗണ്‍സിലര്‍ക്കാവശ്യമായ മുന്നറിയിപ്പ്‌ കൊടുത്തുകൊണ്ടും സംസ്ഥാന കൗണ്‍സിലില്‍ നിന്നു പിന്‍വലിക്കാന്‍ ജില്ലാ കൗണ്‍സിലിന്‌ അധികാരമുണ്ടായിരിക്കും.
ബി) ജില്ലാ കമ്മിറ്റി/ജില്ലാ സെക്രട്ടറിയേറ്റ്‌
രണ്ട്‌ ജില്ലാ കമ്മിറ്റി യോഗങ്ങള്‍ക്കിടയില്‍ ജില്ലാ കമ്മിറ്റി ഏല്‍പ്പിക്കപ്പെട്ടിട്ടുള്ള എല്ലാ ചുമതലകളും സെക്രട്ടേറിയറ്റ്‌ നിര്‍വ്വഹിക്കുന്നതും ജില്ലാ സെക്രട്ടറിയേറ്റിന്റെ എല്ലാ തീരുമാനങ്ങളും അടുത്ത ജില്ലാക്കമ്മറ്റിയില്‍ അംഗീകാരത്തിനുവേണ്ടി റിപ്പോര്‍ട്ട്‌ ചെയ്യേണ്ടതുമാണ്‌.
1. ജില്ലയിലെ യൂണിയന്‍ കാര്യനിര്‍വ്വഹണചുമതല ജില്ലാ കമ്മിറ്റിയില്‍ നിക്ഷിപ്‌തമായിരിക്കും.
2. ജില്ലാ കമ്മിറ്റിക്കു മുമ്പാകെ വരുന്ന പരാതികളും മറ്റ്‌ കാര്യങ്ങളും ഈ നിയമാവലിക്കും തദനുസൃതമായി രൂപീകരിക്കുന്ന ചട്ടങ്ങള്‍ക്കും അനുസൃതമായി കമ്മിറ്റി തീര്‍പ്പുകല്‍പ്പിക്കുന്നതായിരിക്കും.
3. ജില്ലാ കൗണ്‍സിലിന്റെ രണ്ടു യോഗങ്ങള്‍ക്കിടയില്‍ അത്‌ ജില്ലാ കൗണ്‍സിലിന്റെ അധികാരങ്ങള്‍ വിനിയോഗിക്കുന്നതും അത്തരം നടപടികളുടെ ഒരു റിപ്പോര്‍ട്ട്‌ അടുത്ത ജില്ലാ കൗണ്‍സില്‍ യോഗത്തില്‍ സമര്‍പ്പിക്കുന്നതുമാകുന്നു.
4. ജില്ലാ കേന്ദ്രത്തിന്റെ പരിധിയില്‍ നടപ്പിലാക്കേണ്ടുന്ന ഏതെങ്കിലും പ്രത്യേക പരിപാടികളുടെ നടത്തിപ്പിനായി അതിന്‌ സബ്‌ കമ്മിറ്റികള്‍ രൂപീകരിക്കാവുന്നതാണ്‌.
5. പ്രാദേശിക പ്രശ്‌നങ്ങളെ സംബന്ധിച്ച്‌ യൂണിയന്റെ അംഗീകൃത നയപരിപാടിക്കു വിധേയമായി തനതായോ മറ്റു സംഘടനകളുമായി ചേര്‍ന്നോ പ്രക്ഷോഭപരിപാടികള്‍ ആവിഷ്‌ക്കരിച്ച്‌ നടപ്പിലാക്കുന്നതിന്‌ ജില്ലാ കമ്മിറ്റിക്ക്‌ അധികാരമുണ്ടായിരിക്കും. പക്ഷേ പണിമുടക്കം നടത്തുന്നത്‌ സംസ്ഥാന കമ്മിറ്റിയുടെ അംഗീകാരത്തോടെയായിരിക്കണം.
6. ഏരിയകളുടെ കാര്യങ്ങളില്‍ ജില്ലാ കമ്മിറ്റി മേല്‍നോട്ടം വഹിക്കുന്നതും അവയുടെ ശരിയായ നടത്തിപ്പിനുള്ള നിര്‍ദ്ദേശങ്ങള്‍ നല്‍കുന്നതുമാണ്‌.
7. അംഗങ്ങളും ഏരിയകളും ഉന്നയിക്കുന്ന എല്ലാ പരാതികളും ജില്ലാ കമ്മിറ്റി ശ്രദ്ധാപൂര്‍വ്വം അന്വേഷിക്കുന്നതും സംസ്ഥാന കമ്മിറ്റിയുടെ അംഗീകാരത്തിന്‌ വിധേയമായി, ആവശ്യമായ നടപടികള്‍ കൈക്കൊള്ളുന്നതുമാണ്‌.
8. സംസ്ഥാന കൗണ്‍സിലിന്റെയോ സംസ്ഥാന കമ്മിറ്റിയുടെയോ തീരുമാനങ്ങള്‍ക്ക്‌ അനുയോജ്യമായും സാഹചര്യങ്ങള്‍ക്കനുസൃതമായതും യൂണിയന്റെ ഉത്തമതാല്‍പ്പര്യസംരക്ഷണത്തിനുപര്യാപ്‌തമായതും ആയ മറ്റ്‌ നടപടികളും ജില്ലാ കമ്മിറ്റി സ്വീകരിക്കുന്നതായിരിക്കും.
9. ജില്ലാ സെക്രട്ടറിയെ യൂണിയന്‍ പ്രവര്‍ത്തനത്തില്‍ സഹായിക്കുവാന്‍, വേതനത്തോടുകൂടിയോ അല്ലാതെയോയുള്ള എസ്റ്റാബ്ലിഷ്‌മെന്റുകള്‍ക്ക്‌ അനുമതി നല്‍കുന്നതിന്‌ ജില്ലാ കമ്മിറ്റിക്ക്‌ അധികാരമുണ്ടായിരിക്കും.
10. ജില്ലാ സെക്രട്ടറിയുടെ വാര്‍ഷിക റിപ്പോര്‍ട്ടും ഓഡിറ്ററുടെ അഭിപ്രായനിര്‍ദ്ദേശങ്ങള്‍ക്കുള്ള മറുപടിയോടെ ഖജാന്‍ജി സമര്‍പ്പിക്കുന്ന ഓഡിറ്റ്‌ ചെയ്‌ത വരവ്‌ ചെലവ്‌ കണക്കും ആവശ്യമായ ഭേദഗതികളോടെ ജില്ലാക്കമ്മിറ്റി അംഗീകരിക്കേണ്ടതാണ്‌.
11. ഓരോ ഏരിയയിലുമുള്ള യൂണിയനംഗത്വ പരിശോധന ജില്ലാ കമ്മിറ്റി നടത്തുന്നതാണ്‌.
12. ജില്ലാ കേന്ദ്രം നേരിട്ടോ ജില്ലാ കേന്ദ്രത്തിന്റെ പേരിലോ നടത്തിയ ചെലവുകളുടെ എല്ലാ വൗച്ചറുകളും ജില്ലാ കമ്മിറ്റി പരിശോധിച്ച്‌ അംഗീകരിക്കേണ്ടതാണ്‌.
സി) ജില്ലാ പ്രസിഡന്റ്‌, വൈസ്‌ പ്രസിഡന്റുമാര്‍, ജില്ലാ സെക്രട്ടറി, ജോയിന്റ്‌ സെക്രട്ടറിമാര്‍, ഖജാന്‍ജി എന്നിവര്‍ക്ക്‌ അതാത്‌ ജില്ലയുടെ പരിധിയില്‍ സ്ഥിരം മുന്‍കൂര്‍ സംഖ്യയുടെ കാര്യത്തിലൊഴികെയുള്ള കാര്യങ്ങളില്‍ യഥാക്രമം സംസ്ഥാന പ്രസിഡന്റ്‌, വൈസ്‌ പ്രസിഡന്റുമാര്‍, ജനറല്‍ സെക്രട്ടറി, സെക്രട്ടറിമാര്‍, ഖജാന്‍ജി എന്നിവരുടേതിനു സമാനമായ അധികാരങ്ങള്‍ ഉണ്ടായിരിക്കും. ജില്ലാ സെക്രട്ടറിക്കു സ്ഥിരം മുന്‍കൂറായി 2000 (രണ്ടായിരം) രൂപ കൈവശം വയ്‌ക്കാവുന്ന
താണ്‌.
16. പ്രത്യേക കമ്മിറ്റികള്‍
1. എതെങ്കിലും വകുപ്പിലെയോ വിഭാഗത്തിലെയോ അല്ലെങ്കില്‍ ഒരു കൂട്ടം വകുപ്പുകളിലേയോ വിഭാഗങ്ങളിലേയോ ജീവനക്കാരുടെ പ്രശ്‌നങ്ങള്‍ കൈകാര്യം ചെയ്യുവാന്‍ സ്‌പെഷ്യല്‍ കമ്മിറ്റികള്‍ രൂപീകരിക്കുവാന്‍ സംസ്ഥാന കമ്മിറ്റിക്ക്‌ അധികാരമുണ്ടായിരിക്കും.
2. അത്തരം ഓരോ കമ്മിറ്റിയിലും ഉണ്ടായിരിക്കേണ്ടുന്ന അംഗങ്ങളുടെ എണ്ണം സംസ്ഥാന കമ്മിറ്റി തീരുമാ
നിക്കും.
3. സ്‌പെഷ്യല്‍ കമ്മിറ്റികളിലേയ്‌ക്കുള്ള അംഗങ്ങളെ ജില്ലാ കമ്മിറ്റികള്‍ സമര്‍പ്പിക്കുന്ന പാനലുകളില്‍ നിന്ന്‌ സംസ്ഥാന കമ്മിറ്റി തെരഞ്ഞെടുക്കുന്നതാണ്‌.
4. സംസ്ഥാന കമ്മിറ്റിയിലെ ഔദ്യോഗിക ഭാരവാഹികളിലോ അംഗങ്ങളിലോ ഒരാളായിരിക്കും സ്‌പെഷ്യല്‍ കമ്മിറ്റിയുടെ കണ്‍വീനര്‍. യൂണിയന്റെ ട്രഷറര്‍ എല്ലാ സ്‌പെഷ്യല്‍ കമ്മിറ്റികളിലെയും എക്‌സ്‌ ഒഫിഷ്യോ അംഗവും അവയുടെയെല്ലാം ഖജാന്‍ജിയുമായിരിക്കും..
5. സ്‌പെഷ്യല്‍ കമ്മിറ്റികള്‍ ആവശ്യമായ വസ്‌തുതകള്‍ ശേഖരിച്ച്‌ ബന്ധപ്പെട്ട വകുപ്പിന്റെയോ വിഭാഗത്തിന്റെയോ പ്രശ്‌നങ്ങള്‍ പഠിച്ച്‌ പ്രശ്‌നപരിഹാരത്തിനുള്ള നിര്‍ദ്ദേശങ്ങള്‍ രൂപവല്‍ക്കരിക്കുന്നതാകുന്നു.
6. സ്‌പെഷ്യല്‍ കമ്മിറ്റി പ്രശ്‌നപരിഹാരത്തിനുള്ള പ്രക്ഷോഭപരിപാടികള്‍ ആവിഷ്‌ക്കരിക്കുന്നതും സംസ്ഥാനകമ്മിറ്റിയുടെ മുന്‍കൂട്ടിയുള്ള അംഗീകാരത്തോടെ അത്തരം പ്രക്ഷോഭപരിപാടികള്‍ ആരംഭിക്കാന്‍ ഏര്‍പ്പാട്‌ ചെയ്യുന്നതുമാണ്‌
7. സംസ്ഥാനകമ്മിറ്റിയുടെ മുന്‍കൂട്ടിയുള്ള അനുവാദമില്ലാതെ സ്‌പെഷ്യല്‍ കമ്മിറ്റി പണം സംഭരിക്കുവാനോ പണിപ്പിരിവ്‌ നടത്തുവാനോ പാടുള്ളതല്ല.
8. സ്‌പെഷ്യല്‍ കമ്മിറ്റി അതിന്റെ തീരുമാനങ്ങളും ശുപാര്‍ശകളും അംഗീകാരത്തിനും നടപ്പാക്കലിനുമായി സംസ്ഥാന കമ്മിറ്റിക്ക്‌ സമര്‍പ്പിക്കേണ്ടതാണ്‌.
17. ഏരിയ
യൂണിയന്റെ പ്രാഥമിക ഘടകം ഏരിയ ആയിരിക്കും. അത്‌ സംസ്ഥാന കൗണ്‍സില്‍, സംസ്ഥാന കമ്മിറ്റി, ജില്ലാ കൗണ്‍സില്‍, ജില്ലാ കമ്മിറ്റി എന്നിവയ്‌ക്ക്‌ കീഴിലായിരിക്കും.
എ) ഏരിയാ ജനറല്‍ ബോഡി
1. ഈ നിയമാവലിക്കും യൂണിയന്റെ നയപരിപാടികള്‍ക്കും, സംസ്ഥാന കൗണ്‍സില്‍, സംസ്ഥാന കമ്മിറ്റി, ജില്ലാ കൗണ്‍സില്‍, ജില്ലാ കമ്മിറ്റി എന്നിവയുടെ തീരുമാനങ്ങള്‍ക്കും നിര്‍ദ്ദേശങ്ങള്‍ക്കും അനുസൃതമായി ആവശ്യമായ പ്രവര്‍ത്തനങ്ങള്‍ അത്‌ നടത്തും.
2. ഏരിയായില്‍ നിന്ന്‌ ജില്ലാ കൗണ്‍സിലിലേക്ക്‌ തെരഞ്ഞെടുക്കപ്പെട്ടയാളും ആ ഏരിയയില്‍ത്തന്നെ അംഗത്വം തുടരുന്നയാളുമായ ഏതെങ്കിലും ജില്ലാ കൗണ്‍സിലറെ അംഗങ്ങള്‍ക്ക്‌ മതിയായ മുന്നറിയിപ്പ്‌ കൊടുത്തശേഷം ഭൂരിപക്ഷ വോട്ടുകളുടെ അടിസ്ഥാനത്തില്‍ ജില്ലാ കൗണ്‍സിലില്‍ നിന്ന്‌ പിന്‍വലിയ്‌ക്കുവാന്‍ ഏരിയാ ജനറല്‍ ബോഡിക്ക്‌ അധികാരമുണ്ടായിരിക്കും.
ബി) ഏരിയാ കമ്മിറ്റി
1. ഏരിയായുടെ കാര്യനിര്‍വ്വഹണ ചുമതല ഏരിയാ കമ്മിറ്റിയില്‍ നിക്ഷിപ്‌തമായിരിക്കും.
2. ഏരിയാ ജനറല്‍ ബോഡിയുടെ രണ്ടുയോഗങ്ങള്‍ക്കിടയിലുള്ള കാലയളവില്‍ ഏരിയാ ജനറല്‍ ബോഡിയുടെ അധികാരങ്ങള്‍ ഏരിയ കമ്മിറ്റി വിനിയോഗിക്കുന്നതാണ്‌. എന്നാല്‍ അത്തരം കാര്യങ്ങള്‍ക്ക്‌ അടുത്തു ചേരുന്ന ജനറല്‍ ബോഡിയുടെ അംഗീകാരം നേടേണ്ടതുണ്ട്‌.
3. അത്‌ പ്രവര്‍ത്തനപരിപാടികള്‍ ആസൂത്രണം ചെയ്യുന്നതും സംസ്ഥാന കൗണ്‍സില്‍, സംസ്ഥാന കമ്മിറ്റി, ജില്ലാ കൗണ്‍സില്‍, ജില്ലാ കമ്മിറ്റി, ഏരിയാ ജനറല്‍ ബോഡി എന്നിവയുടെ തീരുമാനങ്ങള്‍ നടപ്പിലാക്കുന്നതുമാകുന്നു.
4. യൂണിയന്റെ നയങ്ങളിലൊതുങ്ങി നിന്നുകൊണ്ട്‌ പ്രാദേശിക പ്രശ്‌നങ്ങള്‍ സംബന്ധിച്ച്‌ പ്രവര്‍ത്തനങ്ങളും പ്രക്ഷോഭങ്ങളും ഏരിയാ കമ്മിറ്റി സംഘടിപ്പിക്കുന്നതായിരിക്കും.
5. സാഹചര്യങ്ങള്‍ക്കനുസരിച്ച്‌ യൂണിയന്റെ ഉദ്ദേശ്യങ്ങള്‍ നേടാനുതകുന്ന മറ്റ്‌ പ്രവര്‍ത്തനങ്ങളും, ഈ നിയമാവലിക്കു നിരക്കുന്ന വിധം അതു നടത്തുന്നതാണ്‌.
6. ഏരിയയും, ഏരിയയുടെ പേരിലും നടത്തിയ ചെലവുകളുടെ എല്ലാ വൗച്ചറുകളും ഏരിയാ കമ്മിറ്റി പരിശോധിച്ച്‌ അംഗീകരിക്കേണ്ടതാണ്‌.
7. സെക്രട്ടറിയുടെ വാര്‍ഷിക റിപ്പോര്‍ട്ടും ഓഡിറ്ററുടെ അഭിപ്രായങ്ങള്‍ക്കുള്ള മറുപടിയോടെ ഖജാന്‍ജി സമര്‍പ്പിക്കുന്ന ഓഡിറ്റു ചെയ്‌ത വരവു-ചെലവു കണക്കും ആവശ്യമായ ഭേദഗതികളോടെ ഏരിയാ കമ്മിറ്റി അംഗീകരിക്കേണ്ടതാണ്‌.
സി) ഏരിയാ പ്രസിഡന്റ്‌, വൈസ്‌ പ്രസിഡന്റ്‌, സെക്രട്ടറി, ജോയിന്റ്‌ സെക്രട്ടറി, ഖജാന്‍ജി എന്നിവര്‍ക്ക്‌ സ്ഥിരം മുന്‍കൂറിന്റെ കാര്യത്തിലൊഴിച്ച്‌ ആ ഏരിയയുടെ
പരിധിയില്‍ യഥാക്രമം സംസ്ഥാന പ്രസിഡന്റ്‌, വൈസ്‌ പ്രസിഡന്റ്‌, ജനറല്‍ സെക്രട്ടറി, സെക്രട്ടറി, ഖജാന്‍ജി എന്നിവര്‍ക്കുള്ള അധികാരങ്ങള്‍ ഉണ്ടായിരിക്കും. ഏരിയാ സെക്രട്ടറിക്ക്‌ 1000 (ആയിരം) രൂപ സ്ഥിരം മുന്‍കൂറായി കൈവശം വയ്‌ക്കാവുന്ന
താണ്‌.
ഡി) യൂണിറ്റ്‌ കമ്മിറ്റി
യൂണിയന്റെ സുഗമമായ നടത്തിപ്പിന്‌ ഏരിയയുടെ പരിധിയിലെ പ്രത്യേക പ്രദേശങ്ങളില്‍ കണ്‍വീനറും ജോയിന്റ്‌ കണ്‍വീനറും ഉള്‍പ്പെടുന്ന യൂണിറ്റ്‌ കമ്മിറ്റികള്‍ രൂപീകരിക്കുവാനും അവയുടെ പ്രവര്‍ത്തനരൂപം നിര്‍ണ്ണയിക്കുവാനും ഏരിയാ കമ്മിറ്റികള്‍ക്ക്‌ അധികാരമുണ്ടായിരിക്കും.
18. തര്‍ക്കങ്ങള്‍
(എ) യൂണിയന്‍ കാര്യങ്ങള്‍ സംബന്ധിച്ച്‌ ഒരു ജില്ലാ കേന്ദ്രത്തിനു കീഴിലുള്ള രണ്ടോ കൂടുതലോ ഏരിയകള്‍ തമ്മില്‍ ഉണ്ടാകുന്ന തര്‍ക്കങ്ങള്‍ ജില്ലാ കമ്മിറ്റിയുടെ തീരുമാനത്തിനു വിടേണ്ടതാകുന്നു. ജില്ലാ കമ്മിറ്റി തീരുമാനത്തിനു മേല്‍ ജില്ലാ കൗണ്‍സിലിന്‌ അപ്പീല്‍ സമര്‍പ്പിക്കാവുന്നതും ജില്ലാ കൗണ്‍സിലിന്റെ തീരുമാനം അന്തിമമായിരിക്കുന്നതുമാണ്‌.
(ബി) യൂണിയന്‍ കാര്യങ്ങള്‍ സംബന്ധിച്ച രണ്ടോ അതില്‍ കൂടുതലോ ജില്ലാ കേന്ദ്രങ്ങള്‍ തമ്മിലോ ഒരു ജില്ലയിലെ ഒന്നോ കൂടുതലോ ഏരിയകളും മറ്റു ജില്ലാ കേന്ദ്രങ്ങള്‍ക്ക്‌ കീഴിലുള്ള ഒന്നോ കൂടുതലോ ഏരിയകളും തമ്മിലോ ഉണ്ടാകുന്ന തര്‍ക്കങ്ങള്‍ സംസ്ഥാന കമ്മിറ്റിയുടെ തീരുമാനത്തിന്‌ സമര്‍പ്പിക്കണം. സംസ്ഥാനകമ്മിറ്റിയുടെ തീരുമാനത്തിനെതിരായ അപ്പീല്‍ സംസ്ഥാന കൗണ്‍സിലിന്‌ സമര്‍പ്പിക്കേണ്ടതും സംസ്ഥാന കൗണ്‍സിലിന്റെ തീരുമാനം അന്തിമമായിരിക്കുന്നതുമാണ്‌.
(സി) ഏതെങ്കിലും ഏരിയായോ ജില്ലാ കേന്ദ്രമോ മറ്റൊരു ഏരിയയ്‌ക്കോ ജില്ലാ കേന്ദ്രത്തിനോ എതിരായി നിയമ നടപടികള്‍ സ്വീകരിച്ചുകൂടാത്തതാകുന്നു.
19. ഫണ്ട്‌
(എ) യൂണിയന്റെ ഫണ്ടുകള്‍ താഴെപ്പറയുന്നവ ഉള്‍പ്പെട്ടതായിരിക്കും.
1. അംഗത്വഫീസും അംഗങ്ങളില്‍ നിന്നുള്ള വരിസംഖ്യയും.
2. സ്‌പെഷ്യല്‍ ഫണ്ടുകള്‍ പിരിക്കുന്നതുവഴിയുള്ള വരുമാനം.
3. നിക്ഷേപങ്ങളില്‍ നിന്നുള്ള പലിശ.
4. ഈ നിയമാവലിക്കനുസൃതവും നിയമാനുസൃതവുമായ മറ്റ്‌ മാര്‍ഗ്ഗങ്ങളില്‍ നിന്നുള്ള വരുമാനം
(ബി) യൂണിയന്‌ കിട്ടുന്ന എല്ലാ പണവും ബന്ധപ്പെട്ട കമ്മിറ്റി തീരുമാനിക്കുന്ന ബാങ്കില്‍ പ്രസിഡന്റും ഖജാന്‍ജിയും കൂട്ടായി കൈകാര്യം ചെയ്യുന്നവിധം യൂണിയന്റെ പേരില്‍ നിക്ഷേപിക്കേണ്ടതാണ്‌. പണം കിട്ടി ഏഴുദിവസത്തിനകം ബാങ്കില്‍ നിക്ഷേപിച്ചിരിക്കണം.
(സി) കിട്ടിയ എല്ലാ പണത്തിനും ഖജാന്‍ജി രസീതു കൊടുക്കേണ്ടതാണ്‌.
(ഡി)1. യൂണിയന്‍ ഫണ്ടില്‍ നിന്നുള്ള എല്ലാ ചെലവുകള്‍ക്കും വൗച്ചറുകള്‍ ഉണ്ടായിരിക്കേണ്ടതാണ്‌.
2. സംസ്ഥാനകമ്മറ്റിയെ സംബന്ധിച്ചിടത്തോളം 5000 രൂപയിലും ജില്ലാ കമ്മറ്റിയെ സംബന്ധിച്ചിടത്തോളം 2000 രൂപയിലും ഏരിയാ കമ്മറ്റിയെ സംബന്ധിച്ചിടത്തോളം 1000 രൂപയിലും കൂടുതല്‍ വരുന്ന ചെലവിനങ്ങള്‍ക്ക്‌ ബന്ധപ്പെട്ട കമ്മിറ്റിയുടെ മുന്‍കൂട്ടിയുള്ള അനുമതി ഉണ്ടായിരിക്കേണ്ടതാണ്‌.
3. ഒഴിവക്കാവാനാവാത്തതും ബാധ്യതപ്പെട്ടതുമായ ചെലവിനങ്ങള്‍ക്ക്‌ മേല്‍പ്പറഞ്ഞ നിബന്ധന ബാധകമല്ല. അത്തരം ചെലവുകള്‍ക്ക്‌ ബന്ധപ്പെട്ട കമ്മിറ്റിയുടെ അടുത്ത യോഗത്തില്‍ അംഗീകാരം വാങ്ങണം.
(ഇ) അവിചാരിത ഘട്ടങ്ങളിലൊഴിച്ച്‌ അഡ്വാന്‍സ്‌ എടുക്കാന്‍ പാടില്ലാത്തതാണ്‌.
(എഫ്‌)1. സംസ്ഥാന കൗണ്‍സില്‍, സംസ്ഥാനക്കമ്മിറ്റി, ഈ നിയമാവലിയനുസരിച്ച്‌ രൂപീകൃതമായ കമ്മിറ്റികള്‍, പ്രത്യേക കമ്മിറ്റികള്‍, ട്രസ്റ്റുകള്‍, പ്രസിദ്ധീകരണങ്ങള്‍ എന്നിവയുടെ പ്രവര്‍ത്തനങ്ങള്‍ക്കും ഈ നിയമാവലിയിലും ഇതിനു കീഴിലുള്ള ചട്ടങ്ങളിലും വ്യവസ്ഥചെയ്‌തിട്ടുള്ള മറ്റെല്ലാ ചെലവുകളും യൂണിയന്റെ ഫണ്ടില്‍ നിന്നു വഹിക്കുന്നതാണ്‌.
2. ജില്ലാ കൗണ്‍സില്‍, ജില്ലാ കമ്മിറ്റി എന്നിവയുടെ യോഗങ്ങള്‍ അവയുടെ തീരുമാനങ്ങളും സംസ്ഥാന കൗണ്‍സില്‍, സംസ്ഥാന കമ്മിറ്റി എന്നിവയുടെ തീരുമാനങ്ങളും നടപ്പിലാക്കല്‍ എന്നീ സംഘടനാപരമായ ആവശ്യങ്ങള്‍ക്കും പ്രവര്‍ത്തനത്തിനും ഈ നിയമാവലിയിലും ചട്ടങ്ങളിലും വ്യവസ്ഥ ചെയ്‌തിട്ടുള്ള മറ്റു ചെലവുകളും ജില്ലാ ഫണ്ടില്‍ നിന്ന്‌ വഹിക്കുന്ന
താണ്‌.
3. ഏരിയാകമ്മിറ്റി, ഏരിയാ ജനറല്‍ ബോഡി എന്നിവയുടെ യോഗങ്ങള്‍, അവയുടെ തീരുമാനങ്ങളും സംസ്ഥാന കൗണ്‍സില്‍, സംസ്ഥാന കമ്മിറ്റി, ജില്ലാ കൗണ്‍സില്‍, ജില്ലാ കമ്മിറ്റി എന്നിവയുടെ തീരുമാനങ്ങളും നടപ്പാക്കല്‍, എന്നീ സംഘടനാപരമായ ആവശ്യങ്ങള്‍ക്കും പ്രവര്‍ത്തനങ്ങള്‍ക്കും ഈ നിയമാവലിയിലും ചട്ടങ്ങളിലും വ്യവസ്ഥ ചെയ്‌തിട്ടുള്ള മറ്റ്‌ ചെലവുകള്‍ ഏരിയാ ഫണ്ടില്‍ നിന്ന്‌ വഹിക്കുന്നതായിരിക്കും.
(ജി) 19 (എ) മുതല്‍ (എഫ്‌) വരെയുള്ള വകുപ്പുകളിലുള്ള നിബന്ധനകള്‍ എന്തു തന്നെ ആയാലും സംസ്ഥാന കൗണ്‍സിലിലെയോ സംസ്ഥാനകമ്മറ്റിയിലെയോ അംഗങ്ങളോ ഔദ്യോഗിക ഭാരവാഹികളോ യൂണിയന്റെ മറ്റേതെങ്കിലും പ്രവര്‍ത്തക വിഭാഗങ്ങളിലോ ചെയ്‌തതോ ചെയ്യാവുന്നതോ ആയ ഏതെങ്കിലും ചെലവുകള്‍ പൂര്‍ണ്ണമായോ ഭാഗീകമായോ ജില്ലാ കേന്ദ്രങ്ങളോ ഏരിയകളോ വഹിക്കേണ്ടതാണെന്ന്‌ ആവശ്യമെന്ന്‌ തോന്നുന്നപക്ഷം അങ്ങനെ നിര്‍ദ്ദേശിക്കാന്‍ സംസ്ഥാന കമ്മിറ്റിക്കധികാരമുണ്ടായിരിക്കും.
(എച്ച്‌) കൗണ്‍സിലര്‍മാര്‍, കമ്മിറ്റിയംഗങ്ങള്‍, യൂണിയന്റെ മറ്റു ചുമതലക്കാര്‍ എന്നിവരുടെ യാത്രാച്ചെലവുകള്‍ ക്രമീകരിക്കുന്നതിനായി സംസ്ഥാന കമ്മിറ്റിക്ക്‌ ചട്ടങ്ങള്‍ ഉണ്ടാക്കാവുന്നതും തുക ക്ലിപ്‌തപ്പെടുത്താവുന്നതും നിരക്ക്‌ നിശ്ചയിക്കാവുന്നതുമാകുന്നു. അത്തരം ചട്ടങ്ങള്‍ക്കും തുകയ്‌ക്കും നിരക്കുകള്‍ക്കും വിധേയമായി ജില്ലാ കേന്ദ്രങ്ങളിലെയും ഏരിയകളിലെയും കൗണ്‍സിലര്‍മാരുടെയും കമ്മിറ്റിയംഗങ്ങളുടെയും മറ്റു പ്രവര്‍ത്തകരുടെയും യാത്രാച്ചെലവുകള്‍ ബന്ധപ്പെട്ട ജില്ലാ-ഏരിയാ കമ്മിറ്റികള്‍ക്ക്‌ നിശ്ചയിക്കാവുന്നതാണ്‌.
20. അനുശാസിത വിഹിതം
(എ) അംഗത്വ വിഹിതവും വരിസംഖ്യയുമായി ലഭിക്കുന്ന സംഖ്യയില്‍ നാല്‌ രൂപ ഏരിയാ കമ്മിറ്റിക്കും രണ്ടു രൂപ ജില്ലാ കമ്മിറ്റിക്കും നാലു രൂപ സംസ്ഥാന കമ്മിറ്റിക്കും ആയിരിക്കുന്നതാണ്‌.
(ബി) മേല്‍ വകുപ്പുപ്രകാരം ഉപരികമ്മിറ്റിയ്‌ക്ക്‌ നല്‍കേണ്ടുന്ന സംഖ്യകള്‍ നിര്‍ബന്ധിത അടവാണ്‌. ജില്ലാ കമ്മിറ്റിയിലെയും ഏരിയ കമ്മിറ്റിയിലെയും ഖജാന്‍ജിമാര്‍ യഥാസമയം ഈ വിഹിതം ഉപരികമ്മിറ്റിക്ക്‌ എത്തിക്കേണ്ടതാണ്‌.
21. ഓഡിറ്റര്‍മാര്‍
യൂണിയന്റെ വരവു ചെലവു കണക്കുകള്‍ സംസ്ഥാന കൗണ്‍സിലോ ജില്ലാ കൗണ്‍സിലോ ഏരിയാ ജനറല്‍ ബോഡിയോ തെരഞ്ഞെടുത്ത ഓഡിറ്റര്‍മാരില്‍ ഒരാള്‍ അതതുതലത്തില്‍ ഓഡിറ്റ്‌ ചെയ്യുന്നതാണ്‌.
22. ജില്ലാകമ്മിറ്റിയുടെയോ ഏരിയ കമ്മിറ്റിയുടെയോ ജില്ലാ കൗണ്‍സിലിന്റെയോ, ഏരിയ ജനറല്‍ ബോഡിയുടെയോ, ചുമതലയില്‍ ഹോസ്റ്റലുകള്‍, റിക്രിയേഷന്‍ ക്ലബ്ബുകള്‍, വായനശാലകള്‍, പ്രത്യേക ക്ലാസുകള്‍, അര്‍ഹരായ ജീവനക്കാര്‍ക്കും ജീവനക്കാരുടെ കുടുംബങ്ങള്‍ക്കും വേണ്ടിയുള്ള സഹായനിധികള്‍ എന്നിവ സംഘടിപ്പിക്കാവുന്നതും വരിസംഖ്യയിലൂടെയും സംഭാവനകളിലൂടെയും അതിനുവേണ്ടുന്ന ധനം സ്വരൂപിക്കാവുന്നതും ആകുന്നു. ഇത്തരം കാര്യങ്ങള്‍ക്കു വേണ്ടി സ്വരൂപിക്കുന്ന ഫണ്ട്‌ ബന്ധപ്പെട്ട ജില്ലാ, ഏരിയാ ഫണ്ടിന്റെ ഭാഗമായിരിക്കുന്നതും അതിന്റെ വിനിയോഗം ഈ നിയമാവലിയിലെ വ്യവസ്ഥകള്‍ക്കും ചട്ടങ്ങള്‍ക്കും വിധേയമായിരിക്കുന്നതുമാണ്‌.
23. യോഗങ്ങള്‍
(എ) യോഗങ്ങള്‍ രണ്ടു തരത്തിലായിരിക്കും; സാധാരണവും അസാധാരണവും. വാര്‍ഷികയോഗങ്ങള്‍ സാധാരണയോഗങ്ങളായി ഗണിക്കപ്പെടും.
(ബി) സാധാരണ യോഗങ്ങള്‍ക്ക്‌ നിശ്ചയിച്ചിട്ടുള്ള തീയതിക്ക്‌ 10 (പത്ത്‌) ദിവസത്തില്‍ കുറയാതെയുള്ള നോട്ടീസ്‌ കൊടുത്തിരിക്കണം.
(സി) സാധാരണ യോഗങ്ങള്‍ക്ക്‌, സാധാരണ ഗതിയില്‍, യോഗത്തീയതിയുടെ മൂന്നു ദിവസം മുമ്പ്‌ അറിയിപ്പു കൊടുക്കേണ്ടതാണ്‌. പെട്ടെന്ന്‌ പ്രവര്‍ത്തനം ആവശ്യമായ അടിയന്തിരഘട്ടങ്ങളില്‍ പത്രദ്വാരയുള്ള അറിയിപ്പായാലും മതിയാകുന്നതാണ്‌. ജില്ലാ കൗണ്‍സില്‍, ജില്ലാക്കമ്മിറ്റി എന്നിവയുടെ യോഗങ്ങളെ സംബന്ധിച്ച്‌ ഏരിയകള്‍ക്കും സംസ്ഥാന കൗണ്‍സില്‍, സംസ്ഥാന കമ്മിറ്റി എന്നിവയുടെ യോഗങ്ങളെ സംബന്ധിച്ച്‌ ജില്ലാ കേന്ദ്രങ്ങള്‍ക്കും അറിയിപ്പ്‌ നല്‍കേണ്ടതാണ്‌
(ഡി) ഈ നിയമാവലിയിലെ മറ്റു വ്യവസ്ഥകള്‍ക്കും ബന്ധപ്പെട്ട ചട്ടങ്ങള്‍ക്കും വിധേയമായി കൗണ്‍സിലിന്റെ ആദ്യയോഗത്തിന്റെ അറിയിപ്പ്‌ സാധാരണ യോഗങ്ങള്‍ക്കെന്നപോലെയോ അല്ലാത്തപക്ഷം ഏരിയകളില്‍ നിന്നോ ജില്ലാ കേന്ദ്രങ്ങളില്‍ നിന്നോ പുതിയ കൗണ്‍സിലേക്കു തെരഞ്ഞെടുക്കപ്പെടുന്നവരുടെ പട്ടിക കൈപ്പറ്റിയ ദിവസമോ കൊടുക്കേണ്ടതാണ്‌.
(ഇ) കൗണ്‍സിലിലെയോ കമ്മിറ്റിയിലെയോ, ജനറല്‍ ബോഡിയിലെയോ ഏതെങ്കിലും അംഗത്തിന്‌, ഏതെങ്കിലും യോഗത്തിന്റെ അറിയിപ്പു കിട്ടിയില്ലായെന്ന കാരണം കൊണ്ട്‌ ആ യോഗത്തിന്റെ നടപടികള്‍ അസാധുവാകുന്നതല്ല. 23 (ബി) ചട്ടത്തിന്റെ ലംഘനം കാണിച്ചുകൊണ്ട്‌ യോഗത്തില്‍ പങ്കെടുക്കാന്‍ കഴിയാത്ത കൗണ്‍സിലിലെയോ കമ്മിറ്റിയിലെയോ ജനറല്‍ ബോഡിയിലെയോ അംഗം പ്രസ്‌തുത യോഗത്തിനുശേഷം പത്ത്‌ ദിവസത്തിനകം പ്രസ്‌തുത യോഗ നടപടികള്‍ റദ്ദാക്കണമെന്ന്‌ രേഖാമൂലം ആവശ്യപ്പെട്ടാല്‍ ആയത്‌ ഏരിയ ജനറല്‍ ബോഡിയെ സംബന്ധിച്ച്‌ ഏരിയ കമ്മിറ്റിയും ജില്ലാ കൗണ്‍സിലിന്റെ കാര്യത്തില്‍ ജില്ലാ കമ്മിറ്റിയും സംസ്ഥാന കൗണ്‍സിലിന്റെ കാര്യത്തില്‍ സംസ്ഥാനകമ്മിറ്റിയും പരിഗണിക്കുന്നതാണ്‌. കമ്മിറ്റിയുടെ തീര്‍പ്പിന്‍മേല്‍ നിയമാവലിയിലെ 8-ാം വകുപ്പില്‍ വ്യവസ്ഥ ചെയ്‌തിട്ടുള്ള അപ്പീല്‍ സമര്‍പ്പിക്കാന്‍ പരാതിക്കാരനവകാശമുണ്ട്‌.
24. (എ) സാധാരണയായി ഏരിയാ വാര്‍ഷിക ജനറല്‍ ബോഡി യോഗം ഓരോ വര്‍ഷവും ജനുവരിയില്‍ നടത്തുന്നതാകുന്നു. ജില്ലാ കൗണ്‍സിലിന്റെ വാര്‍ഷികയോഗം ഫെബ്രുവരിയിലും സംസ്ഥാന കൗണ്‍സിലിന്റെ വാര്‍ഷികയോഗം ഏപ്രിലിലും സാധാരണഗതിയില്‍ നടത്തുന്നതാകുന്നു. അതത്‌ കൗണ്‍സിലുകളുടെ വാര്‍ഷികയോഗ നടപടികള്‍ അവസാനിച്ചാല്‍ ഉടന്‍ ജില്ലാ കൗണ്‍സിലിന്റെയും സംസ്ഥാന കൗണ്‍സിലിന്റെയും ആദ്യയോഗം ചേരുന്നതാണ്‌.
(ബി) വാര്‍ഷിക യോഗം നടത്തുന്നതിനുള്ള സമയം നീട്ടാന്‍ സംസ്ഥാനക്കമ്മിറ്റിക്ക്‌ അനുവാദം നല്‍കാവുന്നതാണ്‌.
(സി)1. ജില്ലാ കൗണ്‍സിലിന്റെയും സംസ്ഥാന കൗണ്‍സിലിന്റെയും ആദ്യയോഗങ്ങള്‍ ബന്ധപ്പെട്ട കൗണ്‍സിലിന്റെ വാര്‍ഷിക യോഗനടപടികള്‍ പൂര്‍ത്തിയായ ഉടനെ കൂടുന്നതും അതാത്‌ കമ്മിറ്റിയിലെ ഔദ്യോഗിക ഭാരവാഹികളെയും അംഗങ്ങളെയും ഓഡിറ്റര്‍മാരെയും തെരഞ്ഞെടുക്കുന്നതുമാകുന്നു. ജില്ലാ കൗണ്‍സിലിന്റെ ആദ്യയോഗം സംസ്ഥാന കൗണ്‍സിലര്‍മാരെ തെരഞ്ഞെടുക്കും. അതത്‌ കൗണ്‍സിലുകളുടെ ആദ്യയോഗങ്ങള്‍ ജനറല്‍ സെക്രട്ടറിയോ ജില്ലാ സെക്രട്ടറിയോ സമര്‍പ്പിച്ച കാര്യപരിപാടി പ്രകാരമുള്ള ഇനങ്ങളും കൗണ്‍സിലിന്‌ ആവശ്യമെന്ന്‌ തോന്നുന്ന മറ്റുവിഷയങ്ങളും കൈകാര്യം ചെയ്യുന്നതുമാകുന്നു.
2. ജനറല്‍ സെക്രട്ടറിയും ജില്ലാ സെക്രട്ടറിയും യഥാക്രമം സംസ്ഥാന കൗണ്‍സിലിന്റെയും ജില്ലാ കൗണ്‍സിലിന്റെയും യോഗങ്ങള്‍ക്കുള്ള അറിയിപ്പുകള്‍ ഓരോ കൗണ്‍സിലര്‍മാര്‍ക്കും നല്‍കേണ്ടതാണ്‌.
(ഡി)1. സംസ്ഥാന കൗണ്‍സില്‍ വര്‍ഷത്തില്‍ ചുരുങ്ങിയത്‌ മൂന്നു പ്രാവശ്യമോ ഇല്ലെങ്കില്‍ സംസ്ഥാന കമ്മിറ്റി തീരുമാനിക്കുമ്പോഴോ യോഗം ചേരേണ്ടതാണ്‌
2. സംസ്ഥാന കമ്മിറ്റി സാധാരണഗതിയില്‍ മാസത്തില്‍ ഒരു തവണ യോഗം ചേരുന്നതാണ്‌.
3. ജില്ലാ കൗണ്‍സില്‍ കൊല്ലത്തില്‍ ചുരുങ്ങിയത്‌ മൂന്നു പ്രാവശ്യം അല്ലെങ്കില്‍ എപ്പോഴെല്ലാം ചേരണമെന്ന്‌ സംസ്ഥാന കമ്മിറ്റിയോ ജില്ലാ കമ്മിറ്റിയോ തീരുമാനിക്കുന്നുവോ അപ്പോഴെല്ലാം യോഗം ചേരണം.
4. ജില്ലാ കമ്മിറ്റി സാധാരണ ഗതിയില്‍ മാസത്തില്‍ ഒരു തവണ യോഗം ചേരേണ്ടതാണ്‌.
5. ഏരിയാ ജനറല്‍ ബോഡി വര്‍ഷത്തില്‍ ഏറ്റവും ചുരുങ്ങിയത്‌ മൂന്നു പ്രാവശ്യമോ അല്ലെങ്കില്‍ സംസ്ഥാന കമ്മിറ്റിയോ, ജില്ലാ കമ്മിറ്റിയോ ഏരിയകമ്മിറ്റിയോ തീരുമാനിക്കുമ്പോഴെല്ലാമോ യോഗം ചേരേണ്ടതാകുന്നു.
6. ഏരിയാക്കമ്മിറ്റി സാധാരണ നിലയില്‍ മാസത്തില്‍ ഒരിക്കല്‍ യോഗം ചേരേണ്ടതാണ്‌.
(ഇ) 1. ജനറല്‍ സെക്രട്ടറിയോ ജില്ലാ സെക്രട്ടറിയോ ഏരിയ സെക്രട്ടറിയോ സ്വന്തം തീരുമാനപ്രകാരം ബന്ധപ്പെട്ട കമ്മിറ്റിയുടെയോ കൗണ്‍സിലിന്റെയോ ജനറല്‍ ബോഡിയുടെയോ അസാധാരണയോഗം വിളിച്ചുകൂട്ടാവുന്നതാണ്‌. സംസ്ഥാന കമ്മിറ്റി, സംസ്ഥാന കൗണ്‍സില്‍, ജില്ലാക്കമ്മിറ്റി, ജില്ലാ കൗണ്‍സില്‍, ഏരിയ കമ്മിറ്റി, ഏരിയ ജനറല്‍ ബോഡി എന്നിവയുടെ അംഗസംഖ്യയില്‍ മൂന്നിലൊന്നിന്റെയെങ്കിലും രേഖാമൂലമായ ആവശ്യത്തിനുമേല്‍ പത്തുദിവസത്തിനകം നിര്‍ബന്ധമായും ഇത്തരം അസാധരണയോഗം വിളിച്ചുകൂട്ടേണ്ടതാകുന്നു.
2. ജനറല്‍ സെക്രട്ടറിയോ, ജില്ലാ സെക്രട്ടറിയോ, ഏരിയ സെക്രട്ടറിയോ മേല്‍പ്പറഞ്ഞ ഇ (1) വകുപ്പനുസരിച്ച്‌ യോഗം വിളിച്ചുകൂട്ടുന്നതില്‍ വീഴ്‌ച വരുത്തുന്നപക്ഷം, ജോയിന്റ്‌ സെക്രട്ടറി, പ്രസിഡന്റ്‌, വൈസ്‌ പ്രസിഡന്റ്‌, ഖജാന്‍ജി എന്നിവരില്‍ ആരെങ്കിലും മുന്‍ഗണനാ ക്രമത്തില്‍ ഏഴു ദിവസത്തിനകം അസാധാരണ യോഗം വിളിച്ചുകൂട്ടേണ്ടതാണ്‌.
(എഫ്‌) പ്രസിഡണ്ടോ അദ്ദേഹത്തിന്റെ അഭാവത്തില്‍ വൈസ്‌ പ്രസിഡണ്ടോ ഇവരുടെ അഭാവത്തില്‍ യോഗം തിരഞ്ഞെടുക്കുന്ന അംഗമോ യോഗത്തില്‍ അദ്ധ്യക്ഷത വഹിക്കുന്നതാണ്‌.
(ജി)1. ഈ നിയമാവലിയില്‍ മറ്റുതരത്തില്‍ നിര്‍ണ്ണയിച്ചിട്ടുള്ള സാഹചര്യങ്ങളിലൊഴിച്ച്‌ കൗണ്‍സിലുകളുടെ അവശ്യ ഹാജര്‍ (കോറം) അവയുടെ മൊത്തം അംഗസംഖ്യയുടെ 30 (മുപ്പത്‌) ശതമാനമായിരിക്കും.
2. ജില്ലാ തലസ്ഥാനങ്ങളിലെ ഏരിയാ ജനറല്‍ ബോഡികളുടെ അവശ്യഹാജര്‍ 50 അംഗങ്ങളും മറ്റു ഏരിയാ ജനറല്‍ ബോഡികളുടേത്‌ 25 അംഗങ്ങളും ആയിരിക്കും.
3. വാര്‍ഷിക യോഗങ്ങള്‍ക്ക്‌ അവശ്യ ഹാജര്‍ കണക്കിലെടുക്കേണ്ടതില്ല.
25. തെരഞ്ഞെടുപ്പ്‌
(എ) ഔദ്യോഗിക ഭാരവാഹികളുടെയും മറ്റെല്ലാ പ്രതിനിധികളുടെയും തിരഞ്ഞെടുപ്പ്‌ രഹസ്യബാലറ്റ്‌ വഴി ആയിരിക്കും.
(ബി) ജനറല്‍ സെക്രട്ടറി, ജില്ലാ സെക്രട്ടറി, ഏരിയ സെക്രട്ടറി എന്നിവര്‍ സമ്മതിദായകരുടെ പട്ടികകള്‍ ഉണ്ടാക്കുന്നതും അവ യഥാക്രമം സംസ്ഥാന കൗണ്‍സില്‍, ജില്ലാ കൗണ്‍സില്‍, ഏരിയ എന്നിവയിലെ അംഗങ്ങള്‍ക്ക്‌ ലഭ്യമാക്കുന്നതുമാകുന്നു.
(സി) പിരിഞ്ഞുപോകുന്ന ഔദ്യോഗിക ഭാരവാഹികള്‍, പിരിഞ്ഞുപോകുന്ന കമ്മിറ്റിയിലെ അംഗങ്ങളുടെ സഹായത്തോടെ തെരഞ്ഞെടുപ്പ്‌ യഥാവിധി നടത്താനുള്ള ഏര്‍പ്പാട്‌ ചെയ്യേണ്ടതാണ്‌
(ഡി) ഏരിയകളോ ജില്ലാ കേന്ദ്രങ്ങളോ ആവശ്യപ്പെടുമ്പോഴോ സാഹചര്യങ്ങള്‍ നിര്‍ബന്ധിതമാക്കുമ്പോഴോ ജില്ലാ കമ്മിറ്റിക്ക്‌ ജില്ലാ കേന്ദ്രത്തിന്‌ കീഴിലുള്ള ശാഖകളുടെയും സംസ്ഥാന കമ്മിറ്റിക്ക്‌ ഏതൊരു ജില്ലാ കേന്ദ്രത്തിന്റെയും ഏരിയയുടേയും തെരഞ്ഞെടുപ്പ്‌ മേല്‍നോട്ടം വഹിക്കുകയോ തെരഞ്ഞെടുപ്പു നടത്താവുന്നതോ ആകുന്നു.
(ഇ) ബന്ധപ്പെട്ട വര്‍ഷത്തില്‍ യൂണിയന്റെ അംഗങ്ങളായവരെല്ലാം ഏരിയകളിലെ വാര്‍ഷിക ജനറല്‍ ബോഡിയില്‍ സമ്മതിദായകരായിരിക്കും.
(എഫ്‌) ഒരു ഏരിയയില്‍ അംഗത്വം നേടുകയോ അംഗത്വം പുതുക്കുകയോ ചെയ്‌ത യൂണിയന്റെ ഒരംഗം മറ്റൊരു ഏരിയയില്‍ സ്ഥലംമാറ്റമായി വരികയാണെങ്കില്‍ അംഗത്വവിഹിതമോ വരിസംഖ്യയോ അടച്ച രസീതോ അല്ലെങ്കില്‍ അംഗമാണെന്ന്‌ തെളിയിക്കുന്ന ഏരിയാ സെക്രട്ടറിയുടെ ഒരു സാക്ഷ്യപത്രമോ ഹാജരാക്കുകയാണെങ്കില്‍ മാറ്റമായി എത്തിയിട്ടുള്ള ഏരിയയില്‍ അദ്ദേഹത്തെ ഒരംഗമായി അംഗീകരിക്കും.
(ജി) ഒരു ഏരിയയുടെ പ്രവര്‍ത്തനപരിധിയ്‌ക്കകത്തുള്ള യൂണിയന്റെ അംഗങ്ങളായവര്‍ക്ക്‌ ആ ഏരിയയുടെ സമ്മതിദാനം രേഖപ്പെടുത്താനും തെരഞ്ഞെടുപ്പില്‍ മത്സരിക്കുവാനും അവകാശമുണ്ടായിരിക്കും.
(എച്ച്‌) സംസ്ഥാന കൗണ്‍സില്‍, ജില്ലാ കൗണ്‍സില്‍, ഏരിയ ജനറല്‍ ബോഡി എന്നിവയുടെ കാര്യത്തില്‍ യഥാക്രമം സംസ്ഥാന കമ്മിറ്റിക്കും ജില്ലാ കമ്മിറ്റിക്കും ഏരിയ കമ്മിറ്റിക്കും മൂന്നു ദിവസത്തില്‍ കവിയാത്ത സമയത്തിനുള്ളില്‍ വിവിധ സ്ഥാനങ്ങളിലേക്കുള്ള തെരഞ്ഞെടുപ്പുകളില്‍ മത്സരിക്കുന്ന സ്ഥാനാര്‍ത്ഥികളില്‍ നിന്ന്‌ നാമനിര്‍ദ്ദേശപത്രികകള്‍ ആവശ്യപ്പെടാവുന്നതാണ്‌.
(ഐ) ഓഡിറ്റ്‌ ചെയ്‌ത വരവുചെലവു കണക്ക്‌ പ്രകാരം അംഗത്വവരിസംഖ്യയുടെയും മറ്റും അംഗീകൃത വിഹിതം പൂര്‍ണ്ണമായി ജില്ലാ കേന്ദ്രത്തിലടയ്‌ക്കാത്ത ഏരിയയില്‍ നിന്ന്‌ ജില്ലാ കൗണ്‍സിലിലേക്കു തെരഞ്ഞെടുക്കപ്പെട്ട കൗണ്‍സിലര്‍മാര്‍ക്കും അത്തരം വിഹിതം പൂര്‍ണ്ണമായി യൂണിയനടച്ചിട്ടില്ലാത്ത ജില്ലാ കേന്ദ്രത്തില്‍ നിന്ന്‌ സംസ്ഥാന കൗണ്‍സിലിലേക്ക്‌ തെരഞ്ഞെടുക്കപ്പെട്ട കൗണ്‍സിലര്‍മാര്‍ക്കും ബന്ധപ്പെട്ട കൗണ്‍സിലുകളുടെ യോഗങ്ങളില്‍ പങ്കെടുക്കുവാനോ തെരഞ്ഞെടുപ്പില്‍ പങ്കാളികളാകുവാനോ അര്‍ഹതയുണ്ടായിരിക്കുന്നതല്ല.
(ജെ) ഏതെങ്കിലും ഏരിയകളിലോ കേന്ദ്രങ്ങളിലോ തെരഞ്ഞെടുപ്പ്‌ നടന്നിട്ടില്ല എന്ന കാരണത്താലോ ഏരിയകളോ ജില്ലാ കേന്ദ്രങ്ങളോ വിഹിതമടച്ചില്ലയെന്ന കാരണത്താലോ അത്തരം ഏരിയകളില്‍ നിന്നോ ജില്ലാ കേന്ദ്രങ്ങളില്‍ നിന്നോ ഉള്ള കൗണ്‍സിലര്‍മാരുടെ അഭാവം ബന്ധപ്പെട്ട കൗണ്‍സിലുകളുടെ യോഗ നടപടികള്‍ അസാധുവാക്കുന്നതല്ല.
(കെ) ഏരിയകളിലെ ഏതെങ്കിലും തെരഞ്ഞെടുപ്പിനെതിരായ തെരഞ്ഞെടുപ്പു ഹര്‍ജികള്‍ തെരഞ്ഞെടുപ്പു നടന്ന ദിവസം മുതല്‍ പതിനഞ്ചു ദിവസത്തിനകം ജില്ലാകമ്മിറ്റിക്ക്‌ സമര്‍പ്പിക്കേണ്ടതാകുന്നു. ജില്ലാകമ്മിറ്റിയുടെ തീരുമാനത്തിനുമേല്‍ അപ്പീലുണ്ടെങ്കില്‍ ആയത്‌ പ്രസ്‌തുത തീരുമാനം കൈപ്പറ്റി പത്തുദിവസത്തിനകം സംസ്ഥാന കമ്മിറ്റിക്ക്‌ സമര്‍പ്പിക്കണം.
(എല്‍) ജില്ലാ കേന്ദ്രത്തിലെ തെരഞ്ഞെടുപ്പിനെതിരായുള്ള തെരഞ്ഞെടുപ്പു ഹര്‍ജികള്‍ ആ തെരഞ്ഞെടുപ്പു കഴിഞ്ഞ ദിവസം മുതല്‍ പതിനഞ്ചു ദിവസത്തിനകം സംസ്ഥാന കമ്മിറ്റിക്കു സമര്‍പ്പിക്കേണ്ടതും തെരഞ്ഞെടുപ്പു ഹര്‍ജികളിന്‍മേലും അപ്പീലുകളിന്‍മേലും സംസ്ഥാന കമ്മിറ്റിയുടെ തീരുമാനം അന്തിമമായിരിക്കുന്നതുമാണ്‌.
26. സംരക്ഷണം
(എ) ഓരോ കാര്യത്തിലും സംസ്ഥാന കമ്മിറ്റിയുടെ മുന്‍കൂട്ടിയുള്ള അനുവാദം കിട്ടിയിട്ടുണ്ടെങ്കില്‍ സംസ്ഥാന – ജില്ലാ -ഏരിയ കമ്മിറ്റികളിലെ ഔദ്യോഗിക ഭാരവാഹികള്‍ക്കും അംഗങ്ങള്‍ക്കും ജീവനക്കാര്‍ക്കും കഷ്‌ടനഷ്‌ടങ്ങള്‍ക്കെതിരെ യൂണിയന്‍ സുരക്ഷിതത്വം ഉറപ്പു നല്‍കുന്നതും തങ്ങള്‍ അതത്‌ കമ്മിറ്റികളില്‍ വഹിക്കുന്ന ഔദ്യോഗിക ഭാരവാഹി/അംഗം/പ്രവര്‍ത്തകന്‍ എന്നീ നിലകളില്‍ ഉത്തമവിശ്വാസത്തോടെ ഏര്‍പ്പെടുകയോ ഏര്‍പ്പെടാന്‍ കാരണക്കാരാവുകയോ ചെയ്‌ത ഏതെങ്കിലും കരാറുകളുടെയോ ന്യായയുക്തമായ പ്രവര്‍ത്തികളുടെയോ ഫലമായി അവരില്‍ ആര്‍ക്കെങ്കിലും സംഭവിക്കാവുന്ന കഷ്‌ടനഷ്‌ടങ്ങളും ചെലവുകളും യൂണിയന്റെയോ ജില്ലാ കേന്ദ്രത്തിന്റെയോ ഏരിയയുടേയോ നിധിയില്‍ നിന്ന്‌ വഹിക്കുന്നതുമാകുന്നു.
(ബി) യൂണിയന്‍ ആരുടെയെങ്കിലും പേരില്‍ അന്യായം കൊടുക്കുമ്പോഴോ യൂണിയനെതിരെ വല്ലവരും അന്യായപ്പെടുമ്പോഴോ അത്‌ യൂണിയന്‍ ആസ്ഥാനത്ത്‌, ജനറല്‍ സെക്രട്ടറിയുടെ പേരിലായിരിക്കണം. യൂണിയന്‍ സംസ്ഥാന, ജില്ലാ, ഏരിയകള്‍ക്കുവേണ്ടി മുതല്‍കൂട്ടുന്ന എല്ലാ സ്ഥാവര സ്വത്തുക്കളും ജനറല്‍ സെക്രട്ടറിയുടെ പേരിലായിരിക്കണം.
27. പതാക
യൂണിയന്‌ ചുവപ്പുനിറത്തിലുള്ളതും വലതുമുഷ്‌ടിയില്‍ പിടിച്ച മഞ്ഞനാളത്തോടുകൂടിയ ഒരു വെളുത്ത പന്തം മധ്യത്തില്‍ അങ്കിതവുമായ പതാകയുണ്ടായിരിക്കുന്നതാണ്‌. പതാകയുടെ വലിപ്പം 3:2 എന്ന തോതിലായിരിക്കും.
28. നിയമാവലിക്കു ഭേദഗതികള്‍
സംസ്ഥാന കൗണ്‍സിലിലെ അംഗങ്ങളില്‍ ഹാജരായവരില്‍ മൂന്നില്‍ രണ്ടു ഭൂരിപക്ഷം വോട്ടുകളോടെയല്ലാതെ ഈ നിയമാവലിയില്‍ കൂട്ടിച്ചേര്‍ക്കലോ വെട്ടിക്കുറയ്‌ക്കലോ ഭേദഗതിയോ വരുത്താന്‍ പാടുളള്ളതല്ല.
29. വ്യാഖ്യാനങ്ങള്‍
ഈ നിയമാവലിയെ വ്യാഖ്യാനിക്കാനുള്ള അധികാരം സംസ്ഥാനകമ്മിറ്റിയില്‍ നിക്ഷിപ്‌തമായിരിക്കും.
30. യൂണിയന്‍ വര്‍ഷം
യൂണിയന്‍ വര്‍ഷം ജനുവരി ഒന്നാം തീയതി മുതല്‍ ഡിസംബര്‍ മുപ്പത്തൊന്നാം തീയതി വരെയായിരിക്കും.
31. പരിവര്‍ത്തന ഉപാധി
നിലവിലുള്ള നിയമാവലിക്കു കീഴില്‍ നടത്തിയ പ്രവര്‍ത്തനങ്ങളും ആരംഭിച്ച നടപടികളും ഈ നിയമാവലിക്കു കീഴില്‍ നടത്തിയവയും ആരംഭിച്ചവയുമായി കണക്കാക്കപ്പെടുന്നതാകുന്നു.
(2013 മെയ്‌ 10 വരെയുള്ള ഭേദഗതികള്‍ ഉള്‍പ്പെടുത്തിയത്‌)

കേരള നോണ്‍ ഗസറ്റഡ്‌ ഓഫീസേഴ്‌സ്‌ യൂണിയന്‍
അംഗത്വത്തിനുവേണ്ടിയുള്ള ഹര്‍ജി
1. പേര്‌ :
2. ഔദ്യോഗിക മേല്‍വിലാസം :
3. സ്ഥിരം മേല്‍വിലാസം :
4. ശമ്പളവും ശമ്പള നിരക്കും :

ഞാന്‍ യൂണിയന്റെ നിയമാവലി അനുസരിച്ചു കൊള്ളാമെന്നും യൂണിയന്റെ തീരുമാനമനുസരിച്ച്‌ പ്രവര്‍ത്തിക്കാമെന്നും ഇതിനാല്‍ സമ്മതിച്ചിരിക്കുന്നു.

സ്ഥലം:
തീയതി: ഒപ്പ്‌

(ഓദ്യോഗികാവശ്യാര്‍ത്ഥം)
(ഏരിയാ കമ്മിറ്റിയുടെ ശുപാര്‍ശ)

പ്രവേശന നമ്പര്‍:
ഏരിയയുടെ പേര്‌:
ശുപാര്‍ശകള്‍:
തീയതി: പ്രസിഡന്റ്‌